بۇگىن - مەديتسينا قىزمەتكەرلەرى كۇنى

نۇر-سۇلتان. قازاقپارات - قازاقستاندا جىل سايىن ماۋسىم ايىنىڭ ءۇشىنشى جەكسەنبىسىندە مەديتسينا قىزمەتكەرلەرى كۇنى اتاپ وتىلەدى، دەپ حابارلايدى قازاقپارات.

بۇعان دەيىن ق ر دەنساۋلىق ساقتاۋ ءمينيسترى ەلجان ءبىرتانوۆ مەديتسينا قىزمەتكەرلەرىن كاسىبي مەرەكەمەن قۇتتىقتادى. اسىرەسە COVID-19 پاندەمياسىندا جۇقپالى اۋرۋلار اۋرۋحاناسىندا، پروۆيزورلىق ستاتسيونار، جەدەل مەديتسينالىق جاردەم ستانتسيالارى مەن بارلىق دەنساۋلىق ساقتاۋ ۇيىمدارىندا مەديتسينا قىزمەتكەرلەرىنىڭ جوعارى جاۋاپكەرشىلىكپەن، كاسىبي بىلىكتىلىكپەن ەڭبەك ەتىپ جاتقانىن ايتتى.

«قازاقستاندىق دارىگەرلەردىڭ وسىنداي قيىن ۋاقىتتا باسىمىزعا تۇسكەن اۋىرتپالىقتى جەڭە الاتىنىنا سەنىمدىمىن. مەن بۇعان قازىر ارىپتەستەرىمنىڭ قولىندا ەمدەلىپ جاتىپ تاعى كوز جەتكىزدىم - ولار ءوز ءىسىنىڭ كاسىبي شەبەرى. بارشاڭىزعا مىڭ العىس!»، - دەيدى ە. ءبىرتانوۆ.

سوڭعى دەرەكتەرگە سايكەس، ەلىمىزدە 16779 ادام COVID-19 ۆيرۋسىن جۇقتىردى. قازاقستاندىق دارىگەرلەر ازىرگە 10671 ادامدى ەمدەپ شىعاردى. ودان بولەك، ەلىمىزدە 2 مىڭعا جۋىق مەديتسينا قىزمەتكەرى جانە ۆەدومستۆو باسشىسى ەلجان ءبىرتانوۆ كوروناۆيرۋس جۇقتىرىپ الدى.

27- مامىردا ۇلتتىق قوعامدىق سەنىم كەڭەسىنىڭ 3-وتىرىسىندا ق ر پرەزيدەنتى قاسىم-جومارت توقايەۆ دارىگەرلەردىڭ ەڭبەكاقىسىن كەزەڭ-كەزەڭىمەن كوبەيتۋدى تاپسىردى.

«ولاردىڭ ايلىعى ەكونوميكاداعى ورتاشا جالاقىدان 2,5 ەسە ارتىق بولۋى كەرەك. بۇل كورسەتكىشكە 2023-جىلعا قاراي قول جەتكىزۋ قاجەت. وسى كۇردەلى كەزەڭدە بارشامىز مەديتسينا ماماندارىنىڭ قاجىرلى ەڭبەگىنە كۋا بولدىق»، - دەدى قاسىم-جومارت توقايەۆ.

سونىمەن بىرگە، كوروناۆيرۋس ينفەكتسياسىن ەڭسەرۋگە اتسالىسقان مەديتسينا قىزمەتكەرلەرى ەڭبەكاقىعا قوسىمشا ۇستەمەاقى الادى. ناۋرىز ايىنىڭ سوڭىندا ت ج رەجيمىن قامتاماسىز ەتۋ جونىندەگى مەملەكەتتىك كوميسسيا ەپيدەمياعا قارسى شارالارعا اتسالىسقان مەديتسينا قىزمەتكەرلەرىنە ۇستەمەاقى تاعايىندادى. قاۋىپتىلىگى بويىنشا ءبىرىنشى توپ ماماندارىنىڭ جالاقىسىنا ايىنا 850 مىڭ تەڭگە ۇستەمەاقى قوسىلادى. ەكىنشى توپ - پروۆيزورلىق ستاتسيونار مەن جەدەل جاردەم قىزمەتتەرىنىڭ دارىگەرلەرى، ورتا جانە كىشى مەديتسينا قىزمەتكەرلەرى. ولاردىڭ ۇستەماقىسى ايىنا 425 مىڭ تەڭگەنى قۇرايدى. ءۇشىنشى توپقا كارانتيندىك ستاتسيونار دارىگەرلەرى، ورتا جانە كىشى مەديتسينا قىزمەتكەرلەرى، سانيتارلىق دارىگەرلەر، جەدەل جاردەم جۇرگىزۋشىلەرى جانە تاعى باسقالارى كىرەدى. ولار ايىنا 212 مىڭ تەڭگە ۇستەمەاقى الادى.