ق ر تۇڭعىش پرەزيدەنتىنىڭ باسپا ءسوز حاتشىسى ەلباسىنىڭ قازىرگى دەنساۋلىعى تۋرالى ايتتى

نۇر-سۇلتان. قازاقپارات - ق ر تۇڭعىش پرەزيدەنتىنىڭ باسپا ءسوز حاتشىسى ايدوس ۇكىباي ەلباسىنىڭ دەنساۋلىعى تۋرالى سۇراقتارعا جاۋاپ بەردى، دەپ حابارلايدى قازاقپارات.

«نۇرسۇلتان نازاربايەۆتىڭ كوڭىل-كۇيى جاقسى، سىرقات سيمپتومسىز ءوتىپ جاتىر. دەنە قىزۋى قالىپتى، ك ۆ ي- گە ءتان بەلگىلەر بايقالعان جوق. تۇڭعىش پرەزيدەنت دارىگەرلەردىڭ باقىلاۋىندا. ولاردىڭ ايتۋىنشا، الاڭداۋعا ەش نەگىز جوق»، - دەدى ا. ۇكىباي.

ءمالىم ەتىلگەندەي، وقشاۋلانۋ تالابىنا بايلانىستى ەلباسى قاشىقتان جۇمىس ىستەپ جاتىر.

«بۇل كۇندەرى نۇرسۇلتان ءابىش ۇلى ءبىرقاتار ەلدىڭ كوشباسشىلارىمەن تەلەفون ارقىلى سويلەستى. جالپى، بەينەكونفەرەنتسيا، ۇكىمەتتىك ارنايى بايلانىس سىندى زاماناۋي كوممۋنيكاتسيا قۇرالدارى قولدانىلىپ جاتىر. قىزمەتتىك قۇجاتتاردى جەتكىزۋدە دە بارلىق سانيتارلىق نورمالار ساقتالادى. ازاماتتاردىڭ ۇندەۋى مەن حاتتارىن جەدەل تۇردە ەلەكتروندى فورماتتا جىبەرۋگە تىرىسامىز»، - دەدى ايدوس ۇكىباي.

ايتا كەتەيىك، ەلباسىنىڭ باسپا ءسوز حاتشىسى قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ Covid-19-عا تاپسىرعان سىناماسى وڭ ناتيجە كورسەتكەنىن حابارلاعان ەدى.

«اي باستالعالى نۇرسۇلتان نازاربايەۆتىڭ جۇمىس كەستەسى وتە تىعىز بولدى. ەلباسى ەكىجاقتى كەلىسسوزدەر جۇرگىزىپ، رەسمي تۇلعالاردى قابىلدادى. وعان قوسا، تۇڭعىش پرەزيدەنت وتاندىق جانە شەتەلدىك ب ا ق وكىلدەرىنە سۇحبات بەردى. جالپى العاندا تەلەۆيزيالىق ءتۇسىرىم ءۇشىن 40 ادام جۇمىس ىستەدى، ونىڭ ىشىندە شەت ەلدىڭ ازاماتتارى دا بار. نۇرسۇلتان نازاربايەۆتىڭ جاعدايىن مەديتسينا قىزمەتكەرلەرى باقىلاپ وتىر. الاڭداۋعا نەگىز جوق. ەلباسى زاماناۋي كوممۋنيكاتسيا ارنالارىن پايدالانىپ قاشىقتان جۇمىس ىستەپ جاتىر»، - دەگەن بولاتىن ا. ۇكىباي.