ەلوردادا قازاق تىلىنەن اعىلشىن تىلىنە ىلەسپە اۋدارما جۇرگىزۋ كۋرسى وتكىزىلەدى

نۇر-سۇلتان. قازاقپارات - «ءتىل- قازىنا» ورتالىعى قازاق تىلىنەن اعىلشىن، اعىلشىن تىلىنەن قازاق تىلىنە ىلەسپە اۋدارما جۇرگىزۋدى ۇيرەتۋ كۋرسىن وتكىزەدى، دەپ حابارلايدى قازاقپارات ءتىلشىسى.

ورتالىق كۋرستى مەملەكەتتىك ءتىلدىڭ قولدانىس اياسىن كەڭەيتۋ، ىلەسپە اۋدارماشىلاردىڭ بىلىكتىلىگىن ارتتىرۋ ماقساتىندا ۇيىمداستىرماق.

«اۋدارماشى ماماندارعا اۋدارما تەورياسى مەن پراكتيكاسى، قازاق ءتىلىنىڭ رەسمي ستيلى، اۋدارمانىڭ لەكسيكا - گرامماتيكالىق جانە رەداكسيالاۋ ماسەلەلەرى اياسىندا وقۋ- ادىستەمەلىك كومەك كورسەتىلەدى. كۋرستا اۋدارما تەورياسى، جازباشا اۋدارما مەن اۋىزشا اۋدارمانىڭ ەرەكشەلىكتەرى، ىلەسپە اۋدارماشىعا قاجەتتى بازالىق گرامماتيكالىق جانە فرازەولوگيالىق ۇلگىلەرى، سوزدىك قوردى بايىتۋ جۇمىستارى بويىنشا دارىستەر وقىلادى. سونىمەن قاتار اۋدارماشى ماماندارعا اۋدارما تەورياسى مەن پراكتيكاسى، اۋدارماتانۋدىڭ وزەكتى ماسەلەلەرى شەڭبەرىندە وقۋ- ادىستەمەلىك كومەك كورسەتىلىپ، اۋدارما سالاسىنداعى عالىم ماماندار وزىق تاجىريبەسىمەن بولىسەدى»، - دەپ حابارلايدى ورتالىقتان.

كۋرستى اۋدارماشى، فيلولوگيا عىلىمدارىنىڭ كانديداتى الپەيىسوۆا كامال ءابىلقاسىم قىزى جۇرگىزەدى. وعان ورتالىق جانە جەرگىلىكتى اتقارۋشى ورگاندارىنىڭ اۋدارماشىلارى قاتىسادى. قاتىسۋشىلارعا بىلىكتىلىك سەرتيفيكاتتارى تابىستالادى. كۋرس نۇر-سۇلتان قالاسىنىڭ تۇران كوشەسى 18-مەكەنجايىنداعى بيزنەس ورتالىقتا 22-26-ماۋسىم ارالىعىندا ۇيىمداستىرىلادى. كۇندە تاڭەرتەڭ ساعات توعىزدا باستالادى.