اقتوبەدە وكپەنىڭ قابىنۋىنان كوز جۇمعاندار سانى ارتتى

اقتوبە. قازاقپارات - اقتوبەدە وكپەنىڭ قابىنۋى دەرتىنە شالدىعىپ، كوز جۇمعانداردىڭ باسىم بولىگى ەگدە جاستاعى ادامدار، دەپ حابارلايدى قازاقپارات ءتىلشىسى.

اقتوبە وبلىسى بويىنشا سوڭعى تاۋلىكتە 27 ادامنان كوروناۆيرۋس ينفەكسياسى انىقتالدى. سونىمەن بىرگە وسى ايدا وكپەنىڭ قابىنۋى دەرتى دەندەپ بارادى.

«مامىر- ماۋسىمدا پنيەۆمانيا كۇرت ءوستى. سوڭعى 2 كۇندە تاۋلىگىنە 90 ادام جەتكىزىلدى. ەكى كۇن بۇرىن قابىلداۋدى باستاعان تەمىرجول اۋرۋحاناسىندا 190 ادام پنيەۆمانيادان ەم قابىلداپ جاتىر. جاعدايى ورتاشا اۋىر، تىنىس الۋلارى ناشارلاعان. اۋرۋحاناعا تۇسكەندەردىڭ بارىنەن پتر سىناما الىنادى. ەگەر كوروناۆيرۋس راستالسا، بىردەن ينفەكسيالىق اۋرۋحاناعا جىبەرىلەدى. قالادا بارلىعى 296 ناۋقاسقا وسى دياگنوز قويىلعان. بىزدە بۇل باعىتتا 446 كەرەۋەت دايىندالدى»، - دەدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى سۆەتلانا ەسەنامانوۆا.

ونىڭ ايتۋىنشا، قازىرگى كەزدە اقتوبە قالاسىنداعى تەمىرجول اۋرۋحاناسىندا عانا بوس كەرەۋەت بار. «ءساۋىر ايىمەن سالىستىرعاندا مامىردا وكپەنىڭ قابىنۋ دەرەگى 6 ەسە كوبەيدى. جەدەل جاردەمدى شاقىرۋ دەرەگى سوڭعى اپتادا ەكى ەسە ارتتى. مۇنىڭ ناقتى سەبەبىن ايتا المايمىز. تەكسەرۋ كەزىندە وكپە جۇمىسىنىڭ بۇزىلعانى دا انىقتالدى. بارلىعى وسى دەرتتەن 8 ادام كوز جۇمدى»، - دەدى سۆەتلانا ەسەنامانوۆا.