پرەمەر-مينيستر ماشينا جاساۋ بويىنشا مينيسترلىكتەرگە تاپسىرما بەردى

نۇر-سۇلتان. قازاقپارات - ق ر پرەمەر-ءمينيسترى اسقار مامين ماشينا جاساۋدى دامىتۋ ماسەلەلەرى بويىنشا ءتيىستى تاپسىرمالار بەردى، دەپ حابارلايدى قازاقپارات ءتىلشىسى.

«بيىلعى بەس ايدىڭ قورىتىندىسى بويىنشا، ەكونوميكاداعى قۇلدىراۋعا قاراماستان، ماشينا جاساۋ سالاسىنداعى ءوندىرىس كولەمى 535 ميلليارد تەڭگەنى قۇرادى. بۇل وتكەن جىلعىدان %18,5 جوعارى. قازىر بىزدە ماشينا جاساۋ سالاسىندا 3 مىڭعا جۋىق كاسىپورىن جۇمىس ىستەيدى، ولار ءارتۇرلى ونىمدەردى - بولشەكتەردى شىعارۋدان باستاپ دالدىگى جوعارى تەحنيكالاردى قۇراستىرۋعا دەيىن يگەردى. وسى ارقىلى مۇناي- گاز، مەتاللۋرگيا جانە اگرارلىق ونەركاسىپ سياقتى ەكونوميكانىڭ نەگىزگى سەكتورلارىنىڭ قاجەتتىلىگىن قامتاماسىز ەتۋدە»، - دەپ اتاپ ءوتتى پرەمەر-مينيستر ۇكىمەتتىڭ بۇگىنگى وتىرىسىندا.

وسىعان بايلانىستى قازىرگى ەكونوميكالىق جاعدايدى نازارعا الا وتىرىپ، بىرنەشە باعىتقا باسا نازار اۋدارۋ كەرەك.

«بىرىنشىدەن، ءبىز ءۇشىن جەرگىلىكتى قامتۋدى ارتتىرۋ ماسەلەسى ماڭىزدى بولىپ تابىلادى. بۇگىندە سالا سەكتورلارىن لوكاليزاتسيالاۋ دەڭگەيى %35 باستاپ %95 دەيىن جەتەدى. بۇل كورسەتكىشتەردى ارتتىرۋىمىز كەرەك. ەلدەگى اۆتوپاركتىڭ %70 قىزمەت ەتۋ مەرزىمى ايتارلىقتاي ەسكىرگەنىن نازارعا الساق، بۇل وتە ماڭىزدى. ونى جاڭارتۋ وتاندىق كاسىپورىنداردىڭ قۋاتىن جۇكتەۋگە، جاڭا جۇمىس ورىندارىن اشۋعا، وندىرىستە جانە جولداردا قاۋىپسىزدىكتى قامتاماسىز ەتۋگە، ەلدە ەكولوگيانى جاقسارتۋعا مۇمكىندىك بەرەدى. سونىمەن بىرگە، جوعارى ەۋرازيالىق ەكونوميكالىق كەڭەستىڭ شەشىمىنە سايكەس ءبىز موتورلى كولىك قۇرالدارى ءوندىرىسىن لوكاليزاتسيالاۋ دەڭگەيىن كەمىندە %50 جەتكىزۋىمىز كەرەك. وسىعان وراي، كاسىپورىنداردىڭ ءوز مىندەتتەمەلەرىن ورىنداۋىن باقىلاۋعا الۋ قاجەت»، - دەدى ا. مامين.

پرەمەر-مينيستر يندۋستريا جانە ينفراقۇرىلىمدىق دامۋ مينيسترلىگىنە بۇل ماسەلەلەردى باقىلاۋعا الىپ، لوكاليزاتسيانى، ءوندىرىس كولەمىن ارتتىرىپ، ەكسپورتتى كەڭەيتۋدى تاپسىردى.

«ەكىنشىدەن، قازىرگى ۋاقىتتا قازاقستاندا اۋىل شارۋاشىلىعى تەحنيكاسىنىڭ %70 توزعان، پايدالانۋ مەرزىمى وتكەن. قازاقستاننىڭ ازىق-تۇلىك حابى رەتىنە قالىپتاسۋىن ەسكەرە وتىرىپ، اۋىل شارۋاشىلىعى تەحنيكاسى پاركىن جاڭارتۋ ماڭىزدى مىندەت بولىپ تابىلادى. ول ءۇشىن جاڭا پەرسپەكتيۆالى وندىرىستەردى قۇرۋ ماقساتىندا ەلگە ينۆەستيتسيالار مەن سەرىكتەستەردى تارتۋ قاجەت. اۋىل شارۋاشىلىعى تەحنيكاسىن جاڭارتاتىن بولساق، ەڭبەك ونىمدىلىگى جاقسارادى، اۋىل شارۋاشىلىعى ءوندىرىسى ۇلعايادى. اۋىل شارۋاشىلىعى، يندۋستريا مينيسترلىكتەرىنە ءبىر اي مەرزىمدە اۋىل شارۋاشىلىعى تەحنيكاسى پاركىن جاڭارتۋ بويىنشا ناقتى ۇسىنىستار ازىرلەۋدى تاپسىرامىن»، - دەدى ول.

ءۇشىنشى، ۇكىمەت باسشىسى مۇناي-گاز ماشيناسىن جاساۋدا وتكەن جىلى 63,7 ميلليارد تەڭگەگە ءونىم شىعارىلعانىن اتاپ ءوتتى. بيىلعى 4 ايدا بۇل كورسەتكىش 21 ميلليارد تەڭگەنى قۇرادى، بۇل وتكەن جىلعى كەزەڭمەن سالىستىرعاندا %30 كوپ.

«مۇناي-گاز ماشيناسىن جاساۋ سالاسىنىڭ الەۋەتى ۇلكەن جانە تولىعىمەن جۇزەگە اسىرىلماعان. وسى باعىتتاعى جۇمىستى كۇشەيتۋ كەرەك. سوندىقتان، بۇل سالاعا قاجەتتى جابدىقتاردى ءوندىرۋ ءۇشىن شەتەلدىك سەرىكتەستەر مەن كومپانيالاردى تارتۋىمىز قاجەت. وسىعان وراي، ەنەرگەتيكا جانە يندۋستريا مينيسترلىكتەرىنە ءتيىستى ۇسىنىستار ەنگىزۋدى تاپسىرامىن»، - دەدى پرەمەر-مينيستر.

ءتورتىنشى، مەملەكەت ەكسپورت كەزىندەگى شىعىننىڭ %80 دەيىن وتەۋ ارقىلى باسەكەگە قابىلەتتى جوعارى تەحنولوگيالىق ونىمدەر ەكسپورتىن دامىتۋى كەرەك.

«قازىرگى جاعدايدا قوسىمشا قولداۋ شارالارىنىڭ قاجەتتىلىگى تۋىنداپ وتىر. ساۋدا جانە ينتەگراتسيا، يندۋستريا مينيسترلىكتەرىنە وتاندىق ەكسپورتتاۋشىلارعا جاڭا قولداۋ شارالارىن كورسەتۋ مۇمكىندىگىن پىسىقتاۋدى تاپسىرامىن.

بەسىنشى، وزدەرىڭىزگە بەلگىلى، بيىلعى مامىر ايىندا مەملەكەت باسشىسى ونەركاسىپتى دامىتۋ قورىن قۇرۋدى تاپسىردى. ول سەرپىندى وڭدەۋشى جوبالاردى، ونىڭ ىشىندە ماشينا جاساۋ سالاسىنداعى جوبالاردى قولجەتىمدى كرەديتتەۋدى قامتاماسىز ەتۋى كەرەك. قوردىڭ قىزمەتى جۇمىس ىستەپ جاتقان كاسىپورىنداردى جاڭارتۋعا، جاڭا وندىرىستەردى ۇيىمداستىرۋعا جانە يمپورتتى الماستىرۋدى قامتاماسىز ەتۋگە باعىتتالۋى ءتيىس. سوندىقتان يندۋستريا مينيسترلىگى بيىلعى 1 شىلدەگە دەيىن ونەركاسىپتى دامىتۋ قورىن قۇرۋدى قامتاماسىز ەتسىن»، - دەدى اسقار مامين.

ەسكە سالا كەتسەك، بۇعان دەيىن ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ماشينا جاساۋ سالاسىنداعى نەگىزگى ناتيجەلەردى باياندادى.