اسقار مامين: ءاربىر اكىم كوروناۆيرۋسقا قاتىستى جاعدايدى جەكە باقىلاۋىندا ۇستاسىن
بۇل تۋرالى بۇگىن ۇكىمەت وتىرىسىندا ق ر پرەمەر-ءمينيسترى اسقار مامين ايتتى، دەپ حابارلايدى قازاقپارات ءتىلشىسى.
«يندۋستريا، دەنساۋلىق ساقتاۋ مينيسترلىكتەرى جەكە قورعانۋ قۇرالدارىنىڭ وتاندىق ءوندىرىسىن ۇلعايتۋ جانە حالىق ءۇشىن قولجەتىمدى بولۋىن قامتاماسىز ەتۋ بويىنشا شارالار قابىلداسىن. مۇددەلى مەملەكەتتىك ورگاندارمەن جانە اكىمدىكتەرمەن بىرلەسىپ، جاساندى تىنىس الۋ اپپاراتتارى مەن جەكە قورعانىس قۇرالدارىنىڭ جەتكىلىكتى قورىن جاساۋدى تاپسىرامىن، ولاردىڭ مەملەكەتتىك ماتەريالدىق رەزەرۆتە بولۋىن قامتاماسىز ەتىڭىزدەر»، - دەدى ۇكىمەت باسشىسى.
پرەمەر-مينيستر اكىمدىكتەرگە ءىرى كاسىپورىنداردىڭ ءوز جۇمىسكەرلەرىن جەكە قورعانىس قۇرالدارىمەن قامتاماسىز ەتۋ ماسەلەسىن پىسىقتاۋىن قاتاڭ تاپسىردى.
«اۋىل شارۋاشىلىعى مينيسترلىگى پروفيلاكتيكالىق سانيتارلىق-ۆەتەرينارلىق ءىس-شارالاردىڭ، ونىڭ ىشىندە ءارتۇرلى ينفەكتسيالاردىڭ تارالۋىنا جول بەرمەۋ ءۇشىن ۆاكتسيناتسيا، ەپيزووتياعا قارسى ءىس-شارالار جۇرگىزىلۋىن قاتاڭ باقىلاۋدى قامتاماسىز ەتسىن. دەنساۋلىق ساقتاۋ مينيسترلىگى اكىمدىكتەرمەن بىرلەسىپ، جىل سايىنعى حالىقتى يممۋنيزاتسيالاۋ جوسپارىن ورىنداسىن جانە كوروناۆيرۋس ينفەكتسياسىنا قاتىستى قازىرگى جاعدايدى ەسكەرە وتىرىپ، ءىس- قيمىل الگوريتمىن جاڭارتسىن. ءاربىر اكىم كوروناۆيرۋسقا قاتىستى جاعدايدى تۇراقتى جەكە باقىلاۋىندا ۇستاسىن»، - دەدى اسقار مامين.
