قازاقستاندىقتار قانداي جاعدايدا كوروناۆيرۋسقا تەگىن تەست تاپسىرا الادى؟
قوڭىراۋلاردىڭ كوبى كوروناۆيرۋس بويىنشا اۋرۋحاناعا جاتقىزۋ ماسەلەسىنە قاتىستى.
بۇل جونىندە «الەۋمەتتىك مەديتسينالىق ساقتاندىرۋ قورى» نۇر-سۇلتان قالالىق فيليالىنىڭ باسپا ءسوز قىزمەتىنە سىلتەمە جاساپ قازاقپارات حابارلايدى.
تۇرعىندار پ ت ر- تەست تاپسىرۋ، كوروناۆيرۋس جانە سيمپتومسىز اۋرۋ بەلگىلەرى تۋرالى سۇرايدى. مەديتسينا ۇيىمدارىنىڭ جۇمىسىن، اۋرۋحاناعا جوسپارلى جاتقىزۋ جاعىن ءتۇسىندىرۋدى وتىنەدى.
«ءبىزدىڭ ايماقتىق فيليالدارىمىز جەرگىلىكتى دەنساۋلىق ساقتاۋ باسقارمالارىمەن تىعىز بايلانىستا، ەلىمىزدىڭ ءاربىر تۇرعىنىنا بارىنشا كومەكتەسۋگە تىرىسادى. پ ت ر - تالداۋ تاپسىرۋعا قاتىستى سۇراقتار ءتۇسىپ جاتقاندىقتان، ايتا كەتكىم كەلەدى. باس سانيتار دارىگەردىڭ قاۋلىسىنا سايكەس، 10 سانات بويىنشا COVID-19-عا تەستىلەۋ اقىسىن قور تولەيدى»، - دەپ اتاپ ءوتتى الەۋمەتتىك مەديتسينالىق ساقتاندىرۋ قورى باسقارما ءتوراعاسىنىڭ ورىنباسارى مارات شورانوۆ.
قور قاراجاتى ەسەبىنەن كوروناۆيرۋسقا اقىسىز پ ت ر- تالداۋدان وتۋگە قۇقىلى ازاماتتار:
تەگىن كەپىلدەندىرىلگەن مەديتسينالىق كومەك كولەمىندە:
- ينفەكتسيالىق ستاتسيونارعا جاتقىزىلعان پاتسيەنتتەر؛
- COVID-19 بولۋى مۇمكىن دەگەن كۇدىكپەن پروۆيزورلىق ستاتسيونارعا جاتقىزىلعان پاتسيەنتتەر؛
- COVID-19 بولۋى مۇمكىن، ج ر ۆ ي جانە پنيەۆمونيا بەلگىلەرى بار، ستاتسيونارلىق دەڭگەيدەگى پاتسيەنتتەر؛
- ۇيدە وقشاۋلاۋعا جاعداي بولماعاندا كارانتيندىك يزولياتورعا سيمپتومسىز COVID-19-پەن جاتقىزىلعان ازاماتتار (پتر- تەكسەرۋ، بۇل ساناتتاعىلار ءۇشىن، سول جاتقان ستاتسيونارلاردا جۇرگىزىلەدى)؛
- COVID-19 بولۋى مۇمكىن، ج ر ۆ ي جانە پنيەۆمونيا بەلگىلەرى بار، امبۋلاتورلىق دەڭگەيدەگى پاتسيەنتتەر؛
- سيمپتومسىز COVID-19-پەن بمسك دارىگەر باقىلاۋىنداعى ازاماتتار (پتر- تەكسەرۋ، بۇل ساناتتاعىلار ءۇشىن تىركەلگەن ورنى بويىنشا ەمحانادا تاعايىندالادى)؛
مىندەتتى الەۋمەتتىك مەديتسينالىق ساقتاندىرۋ اياسىندا:
- اۋرۋحاناعا جوسپارلى تۇردە جاتقىزىلعان پاتسيەنتتەر، ونىڭ ىشىندە 37 اپتا مەرزىمىندە بوساندىرۋعا رۇقسات بەرىلگەن جۇكتى ايەلدەر (پ ت ر- تەكسەرۋ تىركەلگەن ورنى بويىنشا ەمحانادا تاعايىندالادى)؛
- اۋرۋحاناعا شۇعىل تۇردە جاتقىزىلعان پاتسيەنتتەر، ونىڭ ىشىندە جۇكتى ايەلدەر مەن بالا بوسانعان انالار (پ ت ر- تەكسەرۋ ستاتسيوناردا جۇرگىزىلەدى)؛
- گەمودياليزدە جاتقان پاتسيەنتتەر (پ ت ر- تەكسەرۋ تىركەلگەن ورنى بويىنشا ەمحانالاردا تاعايىندالادى)؛
- جاڭا تۋعان نارەستەلەر، كلينيكالىق حاتتاماعا سايكەس (پ ت ر- تەكسەرۋ ستاتسيوناردا جۇرگىزىلەدى).
زەرتتەۋ جۇمىستارىن ۇيىمداستىرۋمەن جانە باسقا دا قوسالقى ماسەلەلەرمەن ايماقتىق دەنساۋلىق ساقتاۋ باسقارمالارى اينالىسادى.
«قازىرگى ۋاقىتتا ءبىرقاتار ايماقتا مەديتسينا ۇيىمدارىنىڭ ينفراقۇرىلىمدارى قالىپتاسقان جۇكتەمەلەردى كوتەرە الماۋدا. وسىعان بايلانىستى تەست تاپسىرعىسى كەلەتىندەردىڭ كەزەگى بايقالادى. بۇل دا تەست ناتيجەسىنىڭ جىلدام ۇسىنىلۋىنا اسەر ەتەدى. قور تاراپىنان ءبىز مەديتسينالىق ۇيىمداردىڭ قىزمەت اقىسىن ۋاقىتىلى تولەۋ جونىندەگى مىندەتتەمەمىزدى ورىنداۋعا دايىنبىز»، - دەدى مارات شورانوۆ.
