كوروناۆيرۋس ەپيدەمياسى كوپ مەملەكەتتەردە بۇرىنعىشا بەلسەندى ساتىدا تۇر - حانس كليۋگە
بۇل تۋرالى بەيسەنبى كۇنى وتكەن ونلاين-بريفينگتە دۇنيەجۇزىلىك دەنساۋلىق ساقتاۋ ۇيىمى ەۋروپالىق وڭىرلىك بيۋروسىنىڭ ديرەكتورى حانس كليۋگە مالىمدەدى، دەپ حابارلايدى قازاقپاراتتىڭ مەنشىكتى ءتىلشىسى.
«الەم بويىنشا ۆيرۋس جۇقتىرۋ وقيعاسىنىڭ سانى سەگىز ميلليوننان استى. جالپى ىندەتكە شالدىققانداردىڭ 31 پايىزى مەن قايتىس بولعانداردىڭ 43 پايىزى - ەۋروپالىق وڭىرگە تيەسىلى»، - دەدى كليۋگە.
ول ۆيرۋستىڭ الەم بويىنشا جارتى ميلليونعا جۋىق ادامنىڭ ءومىرىن قيعانىن اتاپ ءوتتى.
حانس كليۋگەنىڭ ايتۋىنشا، كەي ەلدەردە بىرنەشە اپتا بويى ينفەكتسيا جۇقتىرۋ وقيعاسى تومەندەپ، قازىرگى كۇنى جۇقتىرۋ كورسەتكىشى ەۋروپالىق ءوڭىر بويىنشا كۇنىنە ورتاشا العاندا 17-20 مىڭ جاعدايعا دەيىن تۇراقتاعان.
«COVID-19 ەپيدەمياسى كوپتەگەن ەلدە بۇرىنعىشا بەلسەندى ساتىدا. جاپپاي كارانتيننەن كەيىن قالىپتى ءومىردى قالپىنا كەلتىرۋ ماڭىزدى. سونىمەن قاتار مەملەكەتتىك ورگاندار ىندەتتى جۇقتىرۋ جاعدايىن انىقتاپ، تەست جۇرگىزىپ، ينفەكتسياعا شالدىققانداردىڭ بايلانىسقان ادامدارىن انىقتاۋ ءۇشىن بار كۇشىن سالۋى كەرەك. بۇل شارالار جاقىن اپتا نەمەسە ايلاردا جاڭا جاپپاي كارانتين ەنگىزۋدىڭ الدىن الادى»، - دەپ اتاپ ءوتتى ول.
«بىزدە ءبىر قاۋىپ دابىلى بار: بىرنەشە ەلدە كارانتيننەن كەيىن مەكتەپتەر اشىلىپ، جۇقتىرۋ وقيعاسى بىردەن جوعارىلاپ كەتتى. سول سەبەپتى ءبىز ۇقىپتىلىق تانىتىپ، شەكتەۋدى الۋ كەزىندە اسا مۇقيات بولۋىمىز كەرەك. تاعى دا قايتالاپ ايتامىن: بارلىق ەلدە قاۋىپ بۇرىنعىداي جوعارى»، - دەدى د د س ۇ ەۋروپالىق وڭىرلىك بيۋروسىنىڭ باسشىسى.
