حالىقتىڭ قالاعا كوشۋىن توقتاتپاساق اۋىلدى جوندەگەننەن نە پايدا - سەناتور

نۇر-سۇلتان. قازاقپارات - سەناتتىڭ جالپى وتىرىسىندا دەپۋتات مۇحتار جۇماعازيەۆ «اۋىل - ەل بەسىگى» جوباسىنىڭ جۇزەگە اسىرىلۋ بارىسىنداعى كەمشىلىكتەردى اتادى.

ونىڭ پايىمىنشا، حالىقتىڭ قالاعا اعىلۋىن توقتاتۋ ءۇشىن دە اۋىلدى كوركەيتۋ كەرەك، دەپ حابارلايدى قازاقپارات ءتىلشىسى.

«اگرارلىق سەكتوردى دامىتۋعا كەيىنگى بەس جىلدا 1,2 تريلليون تەڭگە ءبولىنىپ، 2014 -جىلمەن سالىستىرعاندا 2,2 ەسە وسكەن. وسى جىلدارى سۋبسيديا كولەمى دە 152 ميلليارد تەڭگەدەن 324 ميلليارد تەڭگەگە، وندىرىلگەن ءونىم كولەمى 1,7 ەسە ءوستى. ارينە كەيىنگى جىلدارى شىعىنداردى اكىمشىلەندىرۋدى جەتىلدىرۋدە ءبىرشاما جۇمىس اتقارىلعانىمەن مەملەكەتتىك رەسۋرستى ءتيىمدى پايدالانۋدا كەمشىلىكتەر ساقتالۋدا. ماسەلەن جەرگىلىكتى ورگانداردىڭ ساپاسىز جوسپارىنىڭ سالدارىنان 2019 -جىل مەن الدىڭعى جىلدارى قوردالانعان شارۋالارعا تيەسىلى 37 ميلليارد تەڭگەگە جۋىق مال شارۋاشىلىعىنا ارنالعان سۋبسيديا قارىزدارى پايدا بولعان. وسىعان بايلانىستى پارلامەنت دەپۋتاتتارىنىڭ ارالاسۋىمەن اۋىل شارۋاشىلىعى تاۋارىن وندىرۋشىلەردىڭ قارىزى تولىعىمەن وتەلدى»، - دەدى مۇحتار جۇماعازيەۆ پارلامەنت سەناتىنىڭ وتىرىسىندا.

سەناتوردىڭ ايتۋىنا قاراعاندا «اۋىل ەل - بەسىگى» جوباسىنىڭ ماقساتى - اۋىلدىڭ ينفراقۇرىلىمىن دامىتۋ، ەلدى مەكەندەگى سۋ مەن جول، دەنساۋلىق ساقتاۋ مەن ءبىلىم بەرۋ سالالارىنا قاتىستى پروبلەمالاردى شەشۋ، اۋىلدىڭ الەۋەتىن ارتتىرۋ.

«2019 -جىلى 30 ميلليارد تەڭگەگە 53 اۋىلدىڭ ينفراقۇرىلىمى جوندەلە باستادى. بۇل ماڭىزدى جوبا. سەبەبى ەلىمىزدىڭ باي اگرارلىق الەۋەتىن پايدالانا وتىرىپ، حالقىمىزدى ورگانيكالىق ونىمدەرمەن قامتاماسىز ەتۋ - تەك اۋىل تۇرعىندارىنىڭ قولىنان كەلەدى. توتەنشە جاعدايدىڭ وزىندە كوكتەمگى ەگىس جۇمىستارىن اتقارىپ شىققانى وسىعان دالەل. جالعان ۋربانيزاتسياعا ەرىپ، اۋىل ادامدارىنا قالاعا كوشۋ پروتسەستەرىن توقتاتۋ ءۇشىن بۇل جوبانىڭ ساپالى ىسكە اسۋى ماڭىزدى دەپ ەسەپتەيمىن»، - دەدى ول.

مۇحتار جۇماعازيەۆ اتالمىش جوبانى جۇزەگە اسىرۋ بارىسىندا ءالى دە سالعىرتتىق، بيۋروكراتيزم باسىم ەكەنىن جەتكىزدى.

«بىرىنشىدەن «اۋىل ەل - بەسىگى» جوباسىندا بارلىق قاجەتتى سالا قامتىلماعان. جۇمىستار ناقتىلانباعان. ارنايى جوبا دەپ اتالعانىمەن ءبىر ارناعا باعىتتالعان، ءبىر ماقساتقا تۇيىستىرىلگەن جوبا جوق. 2025 -جىلعا دەيىنگى وڭىرلەردى دامىتۋدىڭ مەملەكەتتىك باعدارلاماسىنىڭ ىشىنە ءبىر بولىك بولىپ كىرىپ كەتكەن. ەكىنشىدەن جوبانىڭ اكىمشىسى رەتىندەگى ۇلتتىق ەكونوميكا مينيسترلىگى بيۋدجەتتەن بولىنگەن 30 ميلليارد تەڭگەگە عانا باقىلاۋ جۇرگىزەدى. ال اۋىل- ايماقتاردى دامىتۋعا باعىتتالعان «نۇرلى جول»، «نۇرلى جەر»، «جۇمىسپەن قامتۋدىڭ جول كارتاسى» باعدارلامالارىندا قامتىلعان شارالارمەن ۇيلەسىم جوق»، - دەدى ول.

ونىڭ سوزىنشە اۋىلدىڭ جولىن جوندەپ، مەكتەبى مەن اۋرۋحاناسىن رەتتەپ، سۋ مەن گاز بەرىپ، ارلەپ- سىرلاعانىمەن جۇمىس ورىندارى بولماسا حالىقتى، جاستاردى اۋىلدا تۇراقتاندىرۋ مۇمكىن ەمەس.

«اۋىل تۇرعىندارى قالاعا كوشۋىن توقتاتپاسا اۋىلدى جوندەگەننەن نە پايدا؟ قازاگرو حولدينگىنىڭ اقپاراتىنا سۇيەنسەك، «اۋىل - ەل بەسىگى» جوباسى اياسىندا ىسكە اسىرىلاتىن 2451 جوبانىڭ باسىم كوپشىلىگى 400 مىڭ مەن 2 ميلليون تەڭگە ارالىعىنداعى ۇساق-تۇيەك جوبالار. ال تىرەك اۋىلداردى دامىتۋعا مۇمكىندىك بەرەتىن، حالىقتى جۇمىسپەن قامتيتىن، جاقىن جاتقان كىشىگىرىم اۋىلداردىڭ دامۋىن ارقالاي الاتىن ىرگەلى جوبالاردىڭ سانى نەبارى 24»، - دەدى ول.

سەناتور اتالمىش باعدارلامانى جۇزەگە اسىرۋدا ۇكىمەتتەن وسى ماسەلەگە بايلانىستى ناقتى شارالاردى قابىلداۋدى سۇرادى.