الماتى اكىمى كارانتيننىڭ كۇشەيتىلۋىنە بايلانىستى تۇرعىندارعا ۇندەۋ جولدادى

الماتى. قازاقپارات - الماتى اكىمى باقىتجان ساعىنتايەۆ قالاداعى كارانتين تالاپتارىنا قاتىستى تۇسىنىك بەردى، دەپ حابارلايدى قازاقپارات ءتىلشىسى.

ونىڭ ايتۋىنشا، ۇكىمەت وتىرىسىنان سوڭ قالادا قاۋىپسىزدىك شارالارى كۇشەيتىلە تۇسپەك.

«قاۋىپتى ىندەتتىڭ ۋشىعا تۇسۋىنە بايلانىستى ۇكىمەت ەپيدجاعدايدى تۇراقتاندىرۋ بويىنشا جاڭا شارالاردى قولعا الدى. وسى ورايدا الماتىدا دا كارانتين رەجيمىن كۇشەيتۋ بويىنشا قوسىمشا شارالار قابىلداندى. سەنبى- جەكسەنبى، ياعني 20-21-ماۋسىم كۇندەرى ءىرى ساۋدا جانە قىزمەت كورسەتۋ نىساندارىنىڭ قىزمەتى توقتاتىلادى. بۇعان قوسا ساياباقتار، سكۆەرلەر مەن جاياۋ جۇرگىنشىلەر ايماعى، وزەندەر مەن سۋ قويمالارىنىڭ جاعالاۋلارى، تاۋ شاڭعىسى كۋرورتتارى جانە باسقا دا قوعامدىق ورىندار جابىلادى»، - دەدى ول الەۋمەتتىك جەلىدەگى پاراقشاسىندا.

اكىم كارانتين شارالارىن بوساڭسىتۋ COVID-19 دىڭ ورشۋىنە اكەپ سوققانىن ايتتى.

«وسىعان بايلانىستى قالا تۇرعىندارىن بۇل جۇمىستارعا تۇسىنىستىكپەن قاراۋعا شاقىرامىن. كارانتين شارالارىن بوساڭسىتۋ - COVID-19 دىڭ ورشۋىنە اكەپ سوقتى. قالا تۇرعىندارىنان كوشەدە ءجۇرۋىن شەكتەتۋىن سۇرايمىز. اسىرەسە قارت ادامداردىڭ ۇيدە وتىرعانى ابزال. قاۋىپى دەندەپ بارا جاتقان مىنا اۋرۋدى تۇنشىقتىرۋ وزىمىزگە بايلانىستى ەكەنىن ەستەن شىعارمايىق. بارلىق تۋىنداعان سۇراقتار بويىنشا 1308 نومىرىندەگى call-ورتالىققا حابارلاسۋعا بولادى»، - دەدى قالا باسشىسى. بۇعان دەيىن ق ر پرەمەر-ءمينيسترى اسقار ماميننىڭ توراعالىعىمەن ق ر اۋماعىندا كوروناۆيرۋس ينفەكسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ (ۆ ا ك) سەلەكتورلىق وتىرىسى وتكەنىن جازعان ەدىك.

وندا ق ر پرەزيدەنتى قاسىم-جومارت توقايەۆتىڭ تاپسىرماسىنا سايكەس قازاقستانداعى ەپيدەميولوگيالىق جاعدايدى تۇراقتاندىرۋ بويىنشا قوسىمشا شارالار قارالدى.