ديناگۇل باەشيەۆا: كوروناۆيرۋس تاكتيكاسىن وزگەرتتى - ءبىز دە كۇرەس ءتاسىلىن جاڭارتىپ جاتىرمىز

نۇر- سۇلتان. قازاقپارات - قازاقستاننىڭ جەتەكشى ينفەكسيونيست دارىگەرى، مەديتسينا عىلىمدارىنىڭ دوكتورى ديناگۇل باەشيەۆا قازاقستان كوروناۆيرۋس ينفەكسياسىمەن كۇرەس ءتاسىلىن نەلىكتەن وزگەرتكەنىن ايتىپ بەردى، دەپ حابارلايدى قازاقپارات ءتىلشىسى.

«قازىر ەل ىشىندەگى «كوروناۆيرۋس جۇقتىرعانداردى الدىمەن جاتقىزۋ كەرەك دەدى، كەيىن كەرەك ەمەس دەدى» دەگەن ءۋاج ايتىلىپ جاتقانىن بىلەمىز. ءبىراق كوروناۆيرۋسقا قاتىستى جاعدايدىڭ دا وزگەرىسكە ۇشىراپ جاتقانىن ەسكەرۋ كەرەك. ءاۋ باستا جۇقتىرعانداردىڭ ءبارىن دە تەگىس جاتقىزدىق. سەبەبى بىزدە مۇمكىندىك بولدى. ينفەكسيانىڭ پوپۋلياتسياعا كەتىپ قالعانىن قالامادىق. بارىنشا ۇستاپ تۇردىق. ال قازىر كونتسەنتراتسيا ۇلعايىپ كەتتى. كەزىندە ادامداردى جاتقىزعان كەزدە كەيبىرەۋلەر شاعىمدانىپ، مۇلدە ساۋ ەكەنىن دە ايتىپ، شۋلاسقان ەدى. ءبىراق ءبارىبىر اينالىپ كەلگەندە كوروناۆيرۋستىڭ ەل ىشىنە تاراپ كەتكەنىن كورىپ وتىرمىز»، - دەدى ديناگۇل باەشيەۆا دەنساۋلىق ساقتاۋ مينيسترلىگىنىڭ Facebook پاراقشاسىنداعى «مينيسترلىك حابارلايدى» ايدارىندا.

كوروناۆيرۋسقا قاتىستى جاعدايدىڭ وزگەرۋىنە بايلانىستى ونىمەن كۇرەسۋدىڭ ۇستانىمى مەن ادىسىنە دە وزگەرىستەر ەنگىزىلگەن.

«بۇل - حالىقارالىق ستاندارت. كەيبىر مەملەكەتتەر بىردەن ۇجىمدىق يممۋنيتەتتى قالىپتاستىرۋعا كىرىسىپ كەتتى. ماسەلەن ەۋروپا ەلدەرىنىڭ كەيبىرى ۆيرۋس تاراي بەرسىن، تەك قارتتار ءۇيىن جابامىز دەستى. ءبىراق ول ەلدەر قازىر ءبارىبىر اكىمشىلىك شارالاردى قولدانۋ كەرەك ەكەنىن كەش ءتۇسىنىپ وتىر»، - دەدى ول.

ديناگۇل باەشيەۆانىڭ سوزىنشە، قازاقستان كوروناۆيرۋسپەن كۇرەستىڭ جارقىن ۇلگىسىن ءبىرقاتار مەملەكەتكە كورسەتە بىلگەن.

«ال قازىر ءبىز وسى كۇرەس داعدىسىن ۇستانىپ، تىڭ امالدى قولدانا ءبىلۋىمىز قاجەت. قازىر جاعداي وزگەردى. سول سەبەپتى كۇرەس ءتاسىلىن دە وزگەرتۋىمىز كەرەك. اينالىپ كەلگەندە بۇل - ۆيرۋسپەن سوعىس. ۆيرۋس تاكتيكاسىن وزگەرتۋدە. ءبىز دە كۇرەس ءتاسىلىن وزگەرۋىمىز كەرەك. قازىر شۋ كوتەرىلىپ جاتىر. سابىرعا كەلۋ كەرەك. شۋ ەشتەڭەنى شەشپەيدى»، - دەدى ول.

اۆتور: ايان بەكەن ۇلى