قازاقستاندا پوليگونداعى قوقىستى جاعۋ ارقىلى ەنەرگيا وندىرىلەدى

نۇر- سۇلتان. قازاقپارات - پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قالدىقتاردى ەنەرگەتيكالىق كادەگە جاراتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى، دەپ حابارلايدى قازاقپارات ءتىلشىسى.

زاڭ جوباسىنىڭ تۇجىرىمداماسىندا تۇرمىستىق قاتتى قالدىقتاردى جاعۋ ارقىلى ولاردى كادەگە جاراتۋ كوزدەلەدى. بۇل، قالدىقتاردىڭ قورشاعان ورتاعا تەرىس اسەرىن ازايتۋعا جانە ولاردىڭ كومۋگە جاتاتىن كولەمىن قىسقارتۋعا مۇمكىندىك بەرەدى.

«زاڭ جوباسىنا دەپۋتاتتار قاتتى تۇرمىستىق قالدىقتاردى ورتەۋ جولىمەن قايتا وڭدەپ، كەيىننەن ەلەكتر ەنەرگياسىن الۋ ءۇشىن قۇقىقتىق بازا قۇرۋ ماقساتىندا باستاماشىلىق ەتتى. ورتەۋگە قايتا وڭدەۋگە جاتپايتىن قالدىقتاردىڭ ءبىر بولىگى عانا قامتىلادى. جىل سايىن ەلىمىزدە شامامەن 5 ميلليون توننا قالدىق پايدا بولادى. ولاردىڭ تەك 15 پايىزى قايتا وڭدەلەدى. قازىر وسى مىندەتتى ىسكە اسىرۋ ءۇشىن بۇكىل الەمدە قوقىس جاعاتىن كەشەندەر جۇمىس ىستەيدى»، - دەدى ءماجىلىس دەپۋتاتى قۇرالاي قاراكەن.

ونىڭ سوزىنە قاراعاندا، ەلىمىزدە ەلەكتر ەنەرگياسىن ءوندىرۋ ارقىلى قالدىقتاردى تەرميالىق وڭدەۋدەن وتكىزۋگە بولادى. مۇنداي ءتاسىل ەل اۋماعىنداعى پوليگونداردىڭ سانى مەن الاڭىن قىسقارتۋعا عانا ەمەس، سونداي- اق قالدىقتاردى جاعۋدان ەكولوگيالىق ءارى ەكونوميكالىق ناتيجە الۋعا مۇمكىندىك بەرەدى. زاڭ جوباسىنىڭ ماڭىزدى اسپەكتىسى ەلەكتر ەنەرگياسىن الۋ ءۇشىن قالدىقتاردى ەنەرگەتيكالىق كادەگە جاراتۋ بويىنشا سەگمەنتتى قولداۋعا باعىتتالعان نورمالار بولىپ وتىر.

قۇجاتتىڭ تۇجىرىمداماسىنا سايكەس، نەگىزگى قولداۋ تەتىگى قوقىس جاعاتىن كاسىپورىندار وندىرگەن ەلەكتر ەنەرگياسىن كەپىلدى ساتىپ الۋ بولىپ تابىلادى. ول جاڭارتىلاتىن ەنەرگەتيكا سالاسىن قولداۋدىڭ قولدانىستاعى تەتىگىنە ۇقساس بولادى. وسىعان بايلانىستى، زاڭ جوباسىندا ەكولوگيالىق كودەكس پەن «ەلەكتر ەنەرگەتيكاسى تۋرالى» جانە «جاڭارتىلاتىن ەنەرگيا كوزدەرىن پايدالانۋدى قولداۋ تۋرالى» قازاقستان رەسپۋبليكاسىنىڭ زاڭدارىنا وزگەرىستەر مەن تولىقتىرۋلار ەنگىزۋ كوزدەلگەن.

اۆتور: رۋسلان عابباسوۆ