نۇر-سۇلتاندا كوروناۆيرۋستان ءولىم قاۋپىن ازايتاتىن ءدارى قولدانىلىپ جاتىر
بۇل تۋرالى قالالىق قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ايتتى.
«دەنساۋلىق ساقتاۋ مينيسترلىگىنىڭ جانىنداعى كوميسسيا كوروناۆيرۋس ينفەكسياسىن ەمدەۋ تۋرالى حاتتاماعا ۇنەمى وزگەرىستەر ەنگىزىپ وتىرادى. ءبىز بەكىتىلگەن حاتتاما بويىنشا جۇمىس ىستەيمىز. دەكسامەتازون پرەپاراتى تۋرالى ايتاتىن بولساق، ءيا، بىزدە ونداي پرەپارات بار. ونى ءبىزدىڭ ارىپتەستەر اۋرۋى اسقىنعان ناۋقاستاردى ەمدەۋ پروتسەسىندە قولدانىپ جاتىر»، - دەدى قيسىقوۆا.
ايتا كەتەيىك، مۇنىڭ الدىندا ۇلى بريتانيالىق عالىمدار دەكسامەتازون پرەپاراتىنىڭ كوروناۆيرۋس جۇقتىرىپ، جاساندى تىنىس الدىرۋ اپپاراتىنا قوسىلعان ناۋقاستاردىڭ جاعدايىن وڭالتۋعا كومەكتەسەتىنى انىقتاعان ەدى. مۇنداي شەشىمگە ۇلى بريتانيا عالىمدارى كەلگەن.
RECOVERY كلينيكالىق زەرتتەۋى ۇلى بريتانيادا ناۋرىزدا باستالعان. جوباعا جالپى 11500 ناۋقاس 175 اۋرۋحانا بويىنشا قاتىسىپ، ءتۇرلى ءدارى-دارمەكتى سىناقتان وتكىزگەن.
ال كەيىنىرەك د د ۇ كوروناۆيرۋستان ءولىم قاۋپىن ازايتاتىن دارىگە قاتىستى پىكىر بىلدىرگەن بولاتىن.
«بۇل كوروناۆيرۋس جۇقتىرعان ناۋقاستاردىڭ اراسىندا ءولىم قاۋپىن تومەندەتكەن العاشقى ءدارى»، - دەپ مالىمدەگەن ەدى د د ۇ باس ديرەكتورى تەدروس ادحانوم گەبرەيەسۋس.
