پارلامەنت حالىق دەنساۋلىعى تۋرالى كودەكستى قابىلدادى

نۇر-سۇلتان. قازاقپارات - بۇگىن ق ر پارلامەنتى ءماجىلىسىنىڭ جالپى وتىرىسىندا پالاتا دەپۋتاتتارى «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس جوباسىنا سەنات ەنگىزگەن تولىقتىرۋلاردى تالقىلاپ، ول بويىنشا كەلىسىمىن بەردى، دەپ حابارلايدى قازاقپارات.

«مەملەكەت باسشىسى قاسىم- جومارت توقايەۆتىڭ ۇلتتىق قوعامدىق سەنىم كەڭەسىنىڭ وتىرىسىندا بەرگەن تاپسىرماسىنا سايكەس، پارلامەنت سەناتىنىڭ دەپۋتاتتارى «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس جوباسىنا وزگەرىستەر مەن تولىقتىرۋلار ەنگىزدى. بۇل وزگەرىستەر مەن تولىقتىرۋلار ءماجىلىس ماقۇلداعان كودەكس جوباسىنىڭ تۇجىرىمدامالىق ءمانىن وزگەرتپەيدى»، - دەدى ءماجىلىس دەپۋتاتى زاۋرەش امانجولوۆا.

سونىمەن قاتار، ءماجىلىستىڭ جالپى وتىرىسىندا پالاتا دەپۋتاتتارى ىلەسپە زاڭ جوباسىنا سەنات ەنگىزگەن تولىقتىرۋلارمەن كەلىستى.

«مەملەكەت باسشىسى ۇلتتىق قوعامدىق سەنىم كەڭەسىنىڭ وتىرىسىندا مەديتسينا قىزمەتكەرلەرىنىڭ قىلمىستىق جاۋاپتىلىعىنىڭ ورىندىلىعىنا سىني تۇرعىدان تالداۋ جاساۋدى تاپسىردى. وسىعان وراي پارلامەنت سەناتىنىڭ دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا وزگەرىستەر مەن تولىقتىرۋلار ەنگىزدى. قۇقىق بۇزۋشىلاردىڭ كەيبىر ساناتتارى قىلمىستىق كودەكستەن اكىمشىلىك قۇقىق بۇزۋشىلىق كودەكسىنە كوشىرىلدى. بۇل وزگەرىستەر مەن تولىقتىرۋلار ءماجىلىس ماقۇلداعان زاڭ جوباسىنىڭ تۇجىرىمدامالىق ءمانىن وزگەرتپەيدى»، - دەدى ز. امانجولوۆا.

ەسكە سالا كەتەيىك، بيىل 11-ماۋسىمدا ق ر پارلامەنتى سەناتىنىڭ جالپى وتىرىسىندا «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس جوباسى مەن ىلەسپە زاڭ جوباسى قارالدى.

تالقىلاۋ بارىسىندا سەناتورلار تاراپىنان ۇسىنىلعان وزگەرىستەر مەن تولىقتىرۋلار ەسكەرىلە وتىرىپ، قۇجات ماجىلىسكە قايتارىلدى. پارلامەنت قابىلداعان كودەكس جەكە جانە الەمدىك تاجىريبەنىڭ ۇزدىك مىسالدارىنا نەگىزدەلگەن دەنساۋلىق ساقتاۋدىڭ جاڭا، ۇزاق مەرزىمدى مودەلىن قۇرۋعا، سونداي-اق مەديتسينالىق قىزمەتتەردىڭ قولجەتىمدىلىگى مەن ساپاسىن قامتاماسىز ەتۋ ماقساتىن كوزدەيدى. كودەكستى ازىرلەۋ بارىسىندا دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىمدارى، ەكونوميكالىق ىنتىماقتاستىق جانە دامۋ ۇيىمىنا مۇشە مەملەكەتتەردىڭ دامۋ كورسەتكىشتەرى جانە قازاقستان رەسپۋبليكاسىنىڭ 2050 -جىلعا دەيىنگى ستراتەگياسى ەسكەرىلگەن.

قوعامدىق دەنساۋلىق ساقتاۋعا توقتالىپ وتسەك، ەلىمىزدىڭ دەنساۋلىق ساقتاۋ سالاسىنداعى ماقساتتارىنا جەتۋ - مەملەكەتتىڭ، زاڭدى تۇلعالار مەن ازاماتتاردىڭ ورتاق جاۋاپكەرشىلىگى بولعان جاعدايدا عانا مۇمكىن. وسىعان وراي، كودەكس جوباسىنا بۇرىن زاڭنامادا كوزدەلمەگەن جاڭا باپتار ەنگىزىلدى.

مىسالى، سالاارالىق ارەكەتتەستىك ماسەلەلەرىن شەشۋ ماقساتىندا قوعامدىق دەنساۋلىق سالاسىنداعى مەملەكەتتىك ساياساتتى ىسكە اسىرۋ بولىگىندە مەملەكەتتىك ورگانداردىڭ مىندەتتەرى ايقىندالدى. جۇمىسكەرلەر اراسىندا دەنساۋلىق ساقتاۋ مەن پروفيلاكتيكا باعدارلاماسىن ازىرلەپ، ىسكە اسىرۋ، سالاۋاتتى جۇمىس ورىندارىن قۇرۋ جانە جۇمىسكەرلەردىڭ سكرينينگتەردەن ءوتۋ مىندەتتەمەسى - زاڭنامالىق تۇردە كوزدەلگەن.