ءماجىلىس ءتوراعاسى نۇرلان نىعماتۋلين وقشاۋلاندى

نۇر-سۇلتان. قازاقپارات - ق ر پارلامەنتى ءماجىلىسىنىڭ سپيكەرى نۇرلان نىعماتۋلين كوروناۆيرۋسكە بايلانىستى وقشاۋلانۋ تۋرالى شەشىم قابىلدادى.

قازىر ول قاشىقتان جۇمىسىن جالعاستىرۋدا، دەپ حابارلايدى قازاقپارات.

«ءماجىلىس ءتوراعاسى كارانتيندىك شارالاردى قاتاڭ ساقتاپ، جالپى وتىرىستاردى قوسپاعاندا ەشكىممەن تىكەلەي بايلانىستا بولمادى. سونىمەن قاتار، نۇرلان نىعماتۋلين ءاربىر جالپى وتىرىس سايىن كوروناۆيرۋسقا تەست تاپسىردى. اعىمداعى جىلدىڭ 9-11- ماۋسىمى ارالىعىندا ءماجىلىس ءتوراعاسى «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىنىڭ جوباسىنا سەنات ەنگىزگەن تۇزەتۋلەرگە بايلانىستى دەنساۋلىق ساقتاۋ ءمينيسترىن قابىلداعان بولاتىن. ەلجان ءبىرتانوۆتىڭ وڭ ساراپتاماسىنا بايلانىستى، 16- ماۋسىمدا ءماجىلىس ءتوراعاسى تاعى ءبىر سىناقتان ءوتتى. وكىنىشكە وراي، تەست وڭ ناتيجە كورسەتتى. دياگنوز سيمپتومسىز ءتۇرى دەپ قويىلدى. وسىعان وراي، نۇرلان نىعماتۋلين ءوزىن-ءوزى وقشاۋلاۋ تۋرالى شەشىم قابىلدادى. قازىرگى ۋاقىتتا ءماجىلىس ءتوراعاسى قاشىقتىقتان جۇمىسىن جالعاستىرۋدا. 17- ماۋسىمدا وتەتىن ءماجىلىستىڭ جالپى وتىرىسىن ۆيتسە-سپيكەر وتكىزۋدە»، - دەلىنگەن ءماجىلىس اقپاراتىندا.

ەسكە سالا كەتسەك، دەنساۋلىق ساقتاۋ ءمينيسترى ەلجان ءبىرتانوۆ كوروناۆيرۋس جۇقتىرعانى حابارلانعان بولاتىن.

12- ماۋسىمدا ق ر پرەمەر-ءمينيسترى اسقار مامين جامبىل وبلىسىنا جۇمىس ساپارىمەن بارىپ قايتقان. وندا دەنساۋلىق ساقتاۋ ءمينيسترى ە. ءبىرتانوۆ تا بولعان. وسىعان بايلانىستى ۇكىمەت باسشىسى وقشاۋلانۋعا ءماجبۇر بولىپ وتىر.

ارىپتەستەرىمەن بىرگە ءبىلىم جانە عىلىم ءمينيسترى اسحات ايماعامبەتوۆ، اۋىل شارۋاشىلىعى ءمينيسترى ساپارحان وماروۆ پەن ق ر ەكولوگيا، گەولوگيا جانە تابيعي رەسۋستار ءمينيسترى ماعزۇم مىرزاعاليەۆ ءوز ۇيلەرىندە وقشاۋلاندى.