ەكپە جاساۋدىڭ وزەكتىلىگى ونىڭ ساپاسىن زاڭنامالىق دەڭگەيدە بەكىتۋى ماڭىزدى - مينيستر ايدا بالايەۆا
بۇل تۋرالى ق ر اقپارات جانە قوعامدىق دامۋ ءمينيسترى ايدا بالايەۆا ايتتى، دەپ حابارلايدى قازاقپارات ءتىلشىسى.
«ەڭ الدىمەن، وسى وتىرعان بارشاڭىزدى ەسەن- امان كورگەنىمە قۋانىشتىمىن. ءبىزدىڭ بۇگىنگى اڭگىمەمىز دە وسى دەنساۋلىقتىڭ وزەكتى ماسەلەسىنە تىكەلەي قاتىستى بولعاندىقتان، ونى كەزەكتى پىكىرتالاس الاڭىنا شىعارىپ وتىرمىز. وزدەرىڭىزگە ءمالىم، ءبىزدىڭ مينيسترلىگىمىز قوعامداعى ەڭ وزەكتى، ەلدىڭ ەڭ قاراما- قايشى پىكىرلەرى توعىسقان ماسەلەلەردى ورتاعا سالىپ، وسىنداي وي- تالاس الاڭىندا تالقىلاپ، دۇرىس تۇجىرىمدار جيناقتاۋدى داستۇرگە اينالدىردى. بۇگىنگى تاقىرىبىمىز - ەلدى جاپپاۋ ۆاكسيناتسيالاۋ ماسەلەسى. ونىڭ ءمان- مازمۇنىن بىلىكتى مامان، سارابدال ساراپشى رەتىندە سىزدەردەن ارتىق ەشكىم بىلمەيدى»، - دەدى قازاقستانداعى مىندەتتى ەكپە ماسەلەسىن تالقىلاۋعا ارنالعان ونلاين كونفەرەنسيانى اشقان ايدا بالايەۆا.
وسى ورايدا مينيستر «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس جوباسىنىڭ الدىن الۋ ەكپەلەرىن سالۋعا قاتىستى كەيبىر تارماقتارى قوعامنىڭ قىزۋ تالقىسىنا ءتۇسىپ، وزەكتى پروبلەماعا اينالعاندىعىن باسا ايتتى.
«ءبىز بۇل تاقىرىپتى تەك قانا وزەكتى بولعانى ءۇشىن عانا ەمەس، سونىمەن بىرگە ءاربىر ازاماتقا اتالعان شارالاردىڭ زاڭنامالىق دەڭگەيدە بەكىتۋ قاجەتتىگىن ءتۇسىندىرۋ جانە جەتكىزۋ تۇرعىسىندا بارىنشا ماڭىزدىلىعىنا وراي تاڭداپ العانىمىزدى اتاپ وتكەن ورىندى. ۆاكسيناتسيا ماڭىزدىلىعىن، اسىرەسە، قازىرگى بۇكىل الەم كوروناۆيرۋس ىندەتىمەن كۇرەسىپ جاتقان كەزدە قايتا باعالاۋ بارىنشا كۇردەلى ەكەندىگى ءسوزسىز. بۇعان قوسا، ۆاكسينا ازىرلەۋدىڭ وڭ ناتيجەلەرىن تاعىتسىزدانا كۇتىپ وتىرمىز»، - دەدى ول.
ونىڭ اتاپ وتۋىنشە، ۆاكسيناتسياعا قارسى يدەيالار مەن پىكىرلەر دە بار. ولاردى دە ەلەمەي كەتۋگە بولمايدى.
«ويتكەنى، كوپشىلىگى ۆاكسيناتسيانىڭ وزىنە ەمەس، ونىڭ ساپاسىنا قارسى. ءدال وسى ورايدا جاڭا كودەكس اتالعان ەرەكشەلىكتەردىڭ ءبارىن ەسكەرىپ، جاۋاپكەرشىلىكتىڭ، ونىڭ ىشىندە ساپاسىز ۆاكسيناتسيا ءۇشىن دە ناقتى تەتىكتەرىن ەنگىزەدى. وزدەرىڭىز كورىپ وتىرعانداي، بۇل ماسەلەدە بارىنشا سىندارلى ساياسات قاجەت. ونىڭ ءساتتى جۇزەگە اسىرىلۋىنا ءسىز بەن ءبىزدىڭ دەنساۋلىعىمىز عانا ەمەس، سونىمەن بىرگە بالالارىمىز بەن نەمەرەلەرىمىزدىڭ دە امان-ەسەندىگى بايلانىستى. شىنداپ كەلگەندە بولاشاق دەنساۋلىق كەپىلى دە. سوندىقتان دا ءبىز ءۇشىن ءتۇرلى پىكىرلەردى جانە ەڭ الدىمەن وعان قاتىستى ساراپشىلاردىڭ پىكىرلەرىن ەستۋ ماڭىزدى. بۇگىنگى ءبىزدىڭ كەزدەسۋىمىز قوعامداعى زاڭ جوباسىنا قاتىستى بارلىق نەگىزگى ماسەلەلەرگە لايىقتى جاۋاپ تاباتىندىعىنا سەنىمدىمىن»، - دەدى ايدا بالايەۆا.
