اقمولا وبلىسىندا كوروناۆيرۋسكە شالدىققاندار سانى ءوستى
بۇل تۋرالى قازاقپارات ءتىلشىسى وبلىستىق تاۋارلار جانە كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسپا ءسوز قىزمەتىنە سىلتەمە جاساپ حابارلايدى.
«وبلىس ورتالىعىندا قاۋىپتى دەرتى جۇقتىرعانداردىڭ ۇشەۋى ءبىر وتباسىنىڭ مۇشەلەرى - 1976، 1999 -جىلعى ەر ادامدار جانە 1965 -جىلعى ايەل. سونىمەن قاتار، تاعى ءۇش ادامنان مەديتسينالىق كومەككە وزدىگىنەن جۇگىنگەننەن كەيىن انىقتالدى. ولار 1965، 1975 -جىلعى ەر ادامدار مەن 1979 -جىلعى ايەل. ناۋقاستار دەنە قىزۋى، تاماقتىڭ جىبىرلاۋى جانە تىنىس الۋدىڭ قيىنداۋىنا شاعىمدانعان»، - دەيدى ۆەدومستۆودان.
بۇدان بولەك، سەلينوگراد اۋدانىندا 1980 -جىلعى ەر ادام، ساندىقتاۋ اۋدانىندا 1965 -جىلعى ايەل جانە شورتاندى اۋدانىندا 1958 -جىلعى ەر ادام مەن 1989 -جىلعى ايەلدە انىقتالدى. بۇلار دا دىرگەرلەردىڭ كومەگىنە وزدىگىنەن جۇگىنگەن.
«ناۋقاستارعا بەكىتىلگەن كلينيكالىق حاتتاماعا سايكەس مەديتسينالىق كومەك كورسەتىلەدى. ۇيدە ەپيدەمياعا قارسى دەزينفەكتسيالاۋ، سونداي-اق، ناۋقاستارمەن بايلانىستى بولعان ادامدارى انىقتاۋ بويىنشا سانيتارلىق- ەپيدەميولوگيالىق شارالار جۇرگىزىلەدى»، - دەيدى اقمولا وبلىستىق تاۋارلار جانە كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسپا ءسوز قىزمەتىندەگىلەر.
وسى رەتتە، اقمولا وبلىسىندا قازىرگى تاڭدا COVID-19 جۇقتىرعانداردىڭ سانى 205 ادامدى قۇرايدى. ونىڭ ىشىندە 141 ادام جازىلىپ ۇيلەرىنە جىبەرىلگەن.
ايتا كەتەيىك، كوروناۆيرۋس ينفەكتسياسىنىڭ تارالاۋى جيىلەپ كەتۋىنە بايلانىستى كوكشەتاۋ قالاسىندا 7 بلوكپوست قايتادان قويىلىپ، كارانتيندىك شەكتەۋ شارالارى كۇشەيتىلدى.
