قازاقستاندا كوروناۆيرۋس ينفەكتسياسىن ەمدەۋدىڭ جاڭا حاتتاماسى قابىلداندى
بۇل تۋرالى ق ر دەنساۋلىق ساقتاۋ ۆيتسە-ءمينيسترى ليۋدميلا بيۋرابەكوۆا Facebook-تەگى پاراقشاسىندا جازدى، دەپ حابارلايدى قازاقپارات.
«بارلىعىمىز COVID-19 جۇقتىرعانداردىڭ كۇن سايىن ءوسىپ جاتقانىن كورىپ الاڭدايمىز، ولاردىڭ دەنى سيمپتومى جوق ناۋقاستار. ولار قالاي اۋىرادى، ولاردى قالاي ەمدەۋ كەرەك؟ ولاردى ەمدەمەيدى، باقىلامايدى، ولار قاراۋسىز قالادى دەگەن كەرەعار پىكىر قالىپتاستى. سوندىقتان وسى ماسەلەدە اشىق ايتا كەتەيىن، وتىرىستا تالقىلانعان اۋرۋ بەلگىسى جوق ناۋقاستارعا مەديتسينالىق كومەك بەرۋ جونىندەگى حاتتامالاردان الىنعان جاۋاپتاردى جەتكىزەيىن»، - دەدى ليۋدميلا بيۋرابەكوۆا.
جاڭا رەداكتسياداعى حاتتاماعا سايكەس؛
- COVID-19 سيمپتومى جوق ناۋقاس تا ينفەكتسيانى جۇقتىرۋشى، ولاردا 14 كۇن ىشىندە (ينكۋباتسيالىق كەزەڭ) كلينيكالىق بەلگىلەر پايدا بولۋى مۇمكىن.
- سيمپتومى جوق ناۋقاستار ۇيىندە نەمەسە كارانتين نىسانىندا مەديتسينالىق-سانيتارلىق العاشقى كومەكتىڭ كەلىسىمى (م س ا ك) بويىنشا ق ر باس مەملەكەتتىك سانيتاريا دارىگەرىنىڭ قاۋلىسىنا سايكەس ەپيدەمياعا قارسى رەجيمدى ساقتاي وتىرىپ مەديتسينالىق باقىلاۋعا الىنۋى ءتيىس.
- COVID-19-دىڭ جەڭىل تۇرىمەن اۋىرعان تۇلعا ۇيىندە نەمەسە كارانتين نىسانىندا م س ا ك- تىڭ كەلىسىمى بويىنشا ەپيدەمياعا قارسى رەجيمدى ساقتاي وتىرىپ مەديتسينالىق باقىلاۋعا الىنۋى ءتيىس.
COVID-19-دىڭ جەڭىل تۇرىمەن اۋىرعان تۇلعاعا ەتيوتروپتىق ەمدەۋ جۇرگىزىلمەيدى.
امبۋلاتوريالىق جاعدايدا باقىلاۋ كەلەسى الگوريتم بويىنشا جۇرگىزىلەدى:
- كۇن سايىن قوڭىراۋ شالىپ حابارلاسۋ؛
- جالپى جاعدايدى باعالاۋ، دەنە قىزۋى، شاعىمدى انىقتاۋ (جوتەل، تىنىس الۋدىڭ قيىنداۋى، السىزدىك، تەرلەۋ، ءىش ءوتۋ، دەنە ءبورتۋى، ميالگيا جانە تاعى باسقالارى)، ساتۋراتسيا (مۇمكىندىك بولسا)؛
- ۆيدەوكونسۋلتاتسيا (قاجەتتىلىك بولسا)، 3 كۇندە 1 رەتتەن كوپ ەمەس.
- باقىلاۋ كەزەڭىندە كلينيكالىق سيمپتومدار كۇشەيىپ كەتكەندە (دەنە قىزۋىنىڭ كوتەرىلۋى، جوتەل، تىنىس الۋدىڭ قيىنداۋى، دەمىكپە) پاتسيەنت ينفەكتسيالىق ستاتسيونارعا جىبەرىلەدى.
- جەڭىل تۇرىمەن اۋىرعانداردا جوعارى دەنە قىزۋى بولماسا جانە رەسپيراتورلىق سيمپتومداردىڭ رەگرەسسياسى بايقالماسا، سونداي-اق مۇرىن قۋىسىنىڭ جاعىسىندىسىنان الىنعان پ ت ر تەستى بىرنەشە رەت تەرىس ناتيجە كورسەتسە مەديتسينالىق باقىلاۋدان الىنىپ تاستالادى.
مەديتسينالىق كومەك كورسەتۋدىڭ نەگىزگى باعىتتارى:
- پنيەۆمونيانىڭ كلينيكالىق بەلگىلەرىن ەرتە انىقتاۋ جانە دەر كەزىندە اۋرۋحاناعا جاتقىزۋ؛
- اۋرۋلارعا مونيتورينگ جۇرگىزۋ؛
- اۋرۋدىڭ كۇشەيىپ كەتۋىن جانە اۋىرلاي باستاۋىن توقتاتۋ ءۇشىن ەمدەۋدى ەرتە باستاۋ.
