قازاقستاننىڭ بارلىق وڭىرىندە بەلسەندى ۇزاق ءومىر ورتالىقتارى اشىلادى
قازىرگى ۋاقىتتا قۇجات جوباسى ورتالىق مەملەكەتتىك ورگاندار مەن اكىمدىكتەر دەڭگەيىندە، سونداي- اق ونلاين رەجيمدە «اشىق ن ق ا» پورتالىندا تالقىلانۋدا، وندا ءاربىر تىلەك ءبىلدىرۋشى ءوز ۇسىنىستارىن بەرە الادى. بۇل تۋرالى ق ر ە ح ا ق م باسپا ءسوز قىزمەتىى حابارلادى. بەلسەندى ۇزاق ءومىر ورتالىعى ەرەسەك ادامدار اعىلشىن ءتىلىن ۇيرەنىپ، كومپيۋتەرلىك ساۋاتتىلىق كۋرستارىنان ءوتىپ، ەمدىك دەنە شىنىقتىرۋمەن، بيمەن جانە ت. ب. اينالىسا الاتىن بوس ۋاقىتتى ءتيىمدى وتكىزۋ مەكەمەسى بولىپ تابىلادى.
ناتيجەسىندە ەگدە جاستاعى قازاقستاندىقتار قوعامعا بەلسەندى تۇردە ارالاسىپ، ولاردىڭ پسيحوەموتسيونالدىق جاعدايى جاقسارۋدا. ازىرگە مۇنداي ورتالىقتار ەلىمىزدىڭ تەك بىرنەشە قالاسىندا جۇمىس ىستەيدى. الماتى قالاسى بەلسەندى ۇزاق ءومىر ورتالىعى ىسكە قوسىلعان قازاقستانداعى العاشقى ءوڭىر بولدى. ول 2018 -جىلى ماۋسىم ايىندا اشىلدى. ورتالىق 75 ادامعا ەسەپتەلگەن، ءبىراق ۇلكەن سۇرانىسقا بايلانىستى كۇن سايىن وعان 350-گە جۋىق ادام قاتىستى. 2019 -جىلدىڭ سوڭىنا قاراي قالانىڭ بارلىق اۋدانىندا ءدال سونداي 7 مەكەمە ىسكە قوسىلدى.
باعدارلاما دۇنيەجۇزىلىك دەنساۋلىق ساقتاۋ ۇيىمى ازىرلەگەن قارتايۋ پروبلەمالارى جونىندەگى مادريد حالىقارالىق ءىس- قيمىل جوسپارىنىڭ تۇجىرىمداماسىن ەسكەرە وتىرىپ ازىرلەندى. قارتايۋ ماسەلەلەرى جونىندەگى ساراپشىلار بۇكىل ەل بويىنشا بەلسەندى ۇزاق ءومىر ورتالىقتارىنىڭ ماسشتابتالۋىن بارىنشا قاجەتتى جانە ۋاقتىلى شارا دەپ اتايدى.
«ءبىزدىڭ ۇيىمىمىزدىڭ باستى مىندەتتەرىنىڭ ءبىرى اعا بۋىننىڭ سالاۋاتتى ءومىر سالتىن قولداۋ بولىپ تابىلادى. بارلىق وڭىردە بەلسەندى ۇزاق ءومىر ورتالىقتارىنىڭ اشىلعانىنا مەن وتە قۋانىشتىمىن. ويتكەنى، ب ۇ ۇ ەسەپتەۋلەرى بويىنشا، 50 جىلدان كەيىن پلانەتانىڭ ءاربىر التىنشى تۇرعىنى ەگدە جاستاعى ادام بولادى. سوندىقتان قازىردەن باستاپ قارت ادامدارعا ساپالى جانە بەلسەندى ءومىر ءسۇرۋدى قامتاماسىز ەتۋ بويىنشا جۇمىستى باستاۋ اسا ماڭىزدى»، - دەدى «ارداگەر» ق ب ءتورايىمى بايان احمەتجانوۆا.
ايتا كەتۋ كەرەك، سوڭعى 5 جىلدا 65 جاستان اسقان ادامداردىڭ ۇلەسى 2 ەسەگە ارتتى. ناتيجەسىندە حالىقارالىق ستاندارتتارعا سايكەس قازاقستان 2017 -جىلى حالقى ەسەيگەن ەلدەر توبىنا كىردى.
www.24.kz
