ۇلتتىق تەستىلەۋ ورتالىعى ۇ ب ت-نى وتكىزۋ ءتارتىبىن ءتۇسىندىردى

نۇر-سۇلتان. قازاقپارات - ۇلتتىق تەستىلەۋ ورتالىعىنىڭ ديرەكتورى ديدار سماعۇلوۆ بيىلعى ۇ ب ت- نى وتكىزۋ ءتارتىبى جايىندى تۇسىنىك بەردى، دەپ حابارلايدى قازاقپارات ءتىلشىسى.

«كارانتيندىك شەكتەۋلەرگە بايلانىستى ەلدىڭ بارلىق ايماقتارىنداعى ۇ ب ت وتكىزۋ ورىندارىندا كۇشەيتىلگەن مەديتسينالىق-سانيتارلىق شارالار ەنگىزىلەدى. عيماراتقا كىرگىزۋ كەزىندە تەستىلەنۋشىلەردىڭ اراسىنداعى ەكى مەترلىك اراقاشىقتىقتى قاتاڭ ساقتاۋ ارقىلى ماسكالى رەجيم جۇزەگە اسىرىلادى. ءار تەستىلەنۋشى 5 باقىلاۋ كەزەڭىنەن وتەتىن بولادى، ونىڭ ىشىندە سىرتقى كيىمدى دەزينفەكسيالىق ەرىتىندىلەرمەن زالالسىزداندىراتىن ارنايى ءدالىز ارقىلى ءوتۋ ەسكەرىلگەن»، - دەدى د. سماعۇلوۆ ورتالىق كومۋنيكاتسيالار قىزمەتىندە.

سونىمەن قاتار ول تالاپكەر اياق كيىمىن دە دەزينفەكسيالايتىنىن، ودان كەيىن قولىن سانيتايزەرمەن سۇرتەتىنىن جەتكىزدى.

«كەلەسى كەزەڭدە تەستىلەنۋشى تەرموباقىلاۋدان ءوتۋى ءتيىس. ەگەر دەنە قىزۋى انىقتالعان جاعدايدا، وعان كەزەكشى مەديتسينالىق قىزمەتكەرلەر بريگاداسى دەرەۋ كومەك كورسەتەدى. ودان كەيىنگى اركەتتەر تەك مامانداردىڭ بەرىلگەن تالاپتارىنا ساي ورىندالادى»، - دەدى ورتالىق ديرەكتورى.

بارلىق مەديتسينالىق-سانيتارلىق كەزەڭدەردەن وتكەننەن كەيىن، تەستىلەنۋگە رەسپيراتورلىق نەمەسە ءبىر رەت قولدانىلاتىن ماسكالار ۇسىنىلادى.

«ءبىر رەت پايدالانىلاتىن ماسكالاردى تەستىلەۋ بارىسىندا اۋىستىرۋعا مۇمكىندىك قاراستىرىلعان. تەستىلەنۋشى سايكەستەندىرۋدەن وتەدى، تەكسەرۋشى مەن تەستىلەنۋشى اراسىنداعى اراقاشىقتىق ساقتالادى. ءار قاباتتاعى دالىزدەردە سانيتايزەرلەر ورناتىلادى. اۋديتوريادا تەستىلەنۋشىلەردى وتىرعىزۋ كەمىندە ەكى مەتر اراقاشىقتى ساقتاۋ ارقىلى جۇزەگە اسىرىلادى. بۇل رەتتە اۋديتوريا ۇنەمى جەلدەتىلەدى»، - دەدى ديدار سماعۇلوۆ.

بۇدان بۇرىن حابارلانعانداي، بيىل ۇلتتىق ءبىرىڭعاي تەستىلەۋ 20-ماۋسىم مەن 5-شىلدە ارالىعىندا وتەدى.