جاقىنىڭا جاناشىر بول: التاي كولگىنوۆ ەلوردالىقتارعا تاعى دا ۇندەۋ جاسادى

نۇر-سۇلتان. قازاقپارات - نۇر-سۇلتان قالاسىنىڭ اكىمى التاي كولگىنوۆ ەلوردالىقتاردى قوناققا جانە وتباسىلىق مەيرامدارعا بارۋدان باس تارتۋدى ءوتىندى، دەپ حابارلايدى قازاقپارات.

«قوناققا بارۋدان جانە وتباسىلىق مەرەيتويلاردان، سونىمەن قاتار ادامداردىڭ كوپتەپ توپتالىپ جينالۋىنان باس تارتا تۇرۋ قاجەت. تاۋەكەل ءالى دە بار. ساقتىق شارالارىن ساقتاي وتىرىپ، ءسىز ءوزىڭىزدى جانە جاقىندارىڭىزدى قاۋىپسىزدەندىرەسىزدەر. قالادا وتباسىلىق ىندەت وشاقتارى تىركەلدى. ءبىر ادام وتباسىنىڭ بۇكىل مۇشەلەرىنە - قارت اتا-اناسىنا، بالالارىنا، جۇبايىنا جۇقتىرىپ الدى. قالادا ينفەكتسيانىڭ تارالۋىنا جول بەرمەۋ ماقساتىندا زالالسىزداندىرۋ جۇمىستارىن تۇراقتى جۇرگىزەمىز»، - دەپ جازدى التاي كولگىنوۆ Instagram پاراقشاسىندا.

ونىڭ اتاپ وتۋىنشە، ەمحانالار مەن اۋرۋحانالار اۋماعىندا زالالسىزدادىرۋ توننەلدەرى مەن تەپلوۆيزورلاردىڭ سانى ارتىرىلاتىن بولادى.

«وكىنىشكە وراي ىندەت جۇقتىرعانداردىڭ بارلىعى بىردەي مەديتسينا قىزمەتكەرلەرىنىڭ نۇسقاۋلارىن ساقتاي بەرمەيدى. بۇعان قوسا، ولار وزدىگىنەن ەمدەۋمەن ايلانىسىپ، مەديتسينالىق كومەككە دەر ۋاقىتىندا جۇگىنبەيدى. قالاي بولعاندا دا COVID-19-دىڭ اعزا ءۇشىن اۋىر سالدارىن باعالاماۋعا بولمايدى. قالا تۇرعىندارىنىڭ سانيتارلىق نورمالاردى ساقتاماۋى ءارى ەلەمەۋى بۇكىل قالا اۋماعىن شارپيتىن ىندەتتىڭ تارالۋىنا الىپ كەلۋى مۇمكىن. بۇعان جول بەرۋگە بولمايدى. ولاي بولماعان جاعدايدا قاتاڭ كارانتين رەجيمىنە ورالۋعا ءماجبۇر بولامىز»، - دەدى ەلوردا اكىمى.

ەسكە سالساق، ەلوردا اكىمى التاي كولگىنوۆ قالا تۇرعىندارىنا بىرنەشە مارتە ۇندەۋ جاساعان ەدى.

بۇعان دەيىن ق ر ۇكىمەتى جانىنداعى كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا وتىرىسىندا اكىمدەرگە وڭىرلەردەگى كارانتين شارالارىن كۇشەيتۋدى قاراستىرۋ تاپسىرىلعان ەدى.

قاراعاندى وبلىسىندا كارانتيندىك شارالار قايتا كۇشەيتىلدى. 13- ماۋسىمنان باستاپ وڭىردەگى ساۋدا-ويىن-ساۋىق ورتالىقتارى، ازىق-تۇلىك جانە ازىق-تۇلىك ەمەس بازارلاردا شەكتەۋلى ۋاقىتپەن جۇمىس ىستەي باستادى.

ال 14- ماۋسىمنان باستاپ جامبىل وبلىسىندا دا كارانتيندىك شارالار كۇشەيتىلدى.