وزبەكستان باسقا ەلدەرمەن اۋە بايلانىسىن قالپىنا كەلتىرەدى

تاشكەنت. قازاقپارات - وزبەكستان كوروناۆيرۋسقا قاتىستى جاعداي جاقسارعان ەلدەرمەن اۋە بايلانىسىن قايتا قالپىنا كەلتىرەدى، دەپ حابارلايدى قازاقپارات.

بۇل تۋرالى وزبەكستاننىڭ ارنايى رەسپۋبليكالىق كوميسسياسى Telegram-داعى پاراقشاسىندا جاريالادى.

وسىعان بايلانىستى 15-ماۋسىمنان باستاپ وزبەكستانعا كەلەسى تۇلعالاردىڭ كەلۋىنە رۇقسات بەرىلگەن:

شەت ەلدەردىڭ ديپلوماتيالىق وكىلدىكتەر جانە كونسۋلدىق مەكەمەلەرىنىڭ قىزمەتكەرلەرى مەن ولاردىڭ وتباسى مۇشەلەرى؛

وزبەكستاندا ينۆەستيتسيالىق جوبا بويىنشا جۇمىس ىستەيتىن شەتەلدىك كومپانيالاردىڭ ماماندارى، ەمدەلۋگە كەلگەن نەمەسە كەتۋشى تۇلعا؛

شەت ەلدە اۋىر ناۋقاس جاقىن تۋىسى بار ادامدار، وزبەكستاندا تۇراقتى تىركەلگەن شەتەلدىكتەر، ازاماتتىعى جوقتار، سونداي- اق شەتەلدە تۇراقتى تۇراتىن وزبەكستان ازاماتتارى. سونىمەن قاتار، وزبەكستاندىقتارعا شەتەلدە وقۋىن نەمەسە جۇمىسىن جالعاستىرۋ ءۇشىن ەلدەن كەتۋىنە رۇقسات ەتىلگەن.

وزبەكستاننىڭ كولىك مينيسترلىگى شەتەلدەن ازاماتتاردى جەتكىزەتىن چارتەرلىك رەيستەردىڭ 15-21- ماۋسىم ارالىعىنداعى كەستەسىن بەكىتتى.

وسى ارالىقتا 11 رەيس جاسالادى.