دەنساۋلىق ساقتاۋ ءمينيسترى ەلجان ءبىرتانوۆ كوروناۆيرۋس جۇقتىرىپ، اۋرۋحاناعا ءتۇستى
مينيستر بۇل جايىندا ءوزىنىڭ Facebook پاراقشاسىندا جازدى.
«دوستار، وزدەرىڭىزگە جاعىمسىز جاڭالىق جەتكىزۋىمە تۋرا كەلىپ وتىر. كوروناۆيرۋسقا تاپسىرعان سوڭعى تەست ناتيجەسى ناشار شىقتى، مەنەن دە اۋرۋ انىقتالدى. وكىنىشكە قاراي، مەندەگى سيمپتومسىز فورما ەمەس، سوندىقتان جۇقپالى اۋرۋلار اۋرۋحاناسىندا جاتىرمىن. سانيتارلىق شارالاردى قاتاڭ ساقتاعانىما قاراماستان، بۇل ىندەت مەنى دە اينالىپ وتپەدى. اسىرەسە، قاشىقتان، ۇيدە وتىرىپ جۇمىس ىستەي المايتىن قىزمەتكەرلەرگە قيىن. سوڭعى كۇندەرى ءبىرقاتار وڭىردە، ونىڭ ىشىندە كاسىپكەر، كاسىپورىن، مەديتسينا ماماندارى، مەملەكەتتىك، ب ا ق قىزمەتكەرلەرى اراسىنان ىندەت جۇقتىرعاندار قاتارى ارتۋدا. قازاقستانداعى جاھاندىق داعدارىس پەن پاندەميا سالدارىنان پايدا بولعان پروبلەمالاردى شەشۋ ءۇشىن قازىر كوپتەگەن ازامات قارقىندى جۇمىس ىستەۋدە. بىزگە ءجيى جەكە كەزدەسۋلەرگە بارۋعا، ايماقتارعا ءىسساپارعا شىعۋعا تۋرا كەلەدى، مۇنداي جاعدايدا، ارينە، COVID-19 جۇقتىرۋ قاۋپى دە جوعارى» دەپ جازادى دەنساۋلىق ساقتاۋ ءمينيسترى.
ەلجان ءبىرتانوۆ بارشا قازاقستاندىقتاردى «جەكە كارانتين» ەرەجەلەرىن قاتاڭ ساقتاۋعا شاقىردى.
ونىڭ ايتۋىنشا، اۋرۋدىڭ الدىن الۋ شارالارىنا مۇقيات ءمان بەرۋ كەرەك.
1. جۇمىستا، كولىكتە، كوشەدە، دۇكەندە جانە باسقا جەرلەردە مۇمكىندىگىنشە اراقاشىقتىقتى ساقتاڭىز؛
2. ەگەر ءسىز وفيس قىزمەتكەرى بولساڭىز، مۇمكىندىگىنشە ۇيدەن جۇمىس ىستەۋگە تىرىسىڭىز.
3.تۋىس، دوستارمەن ونلاين، ۆيدەو- قوڭىراۋ جانە وزگە دە جاڭا تەحنولوگيالاردىڭ كومەگىمەن بايلانىس ورناتىڭىز؛
4. قوعامدىق ورىندا ماسكا كيىپ ءجۇرىڭىز؛
5. قولدى كەم دەگەندە 20 سەكۋن سابىنمەن ءجيى جۋىپ، سانيتايزەرمەن ءسۇرتىڭىز؛
6. ءوزىڭىزدىڭ جانە وتباسى مۇشەلەرىنىڭ تەمپەراتۋراسىن ءجيى ولشەپ تۇرىڭىز.
«ەگەر بويىڭىزدان السىزدىك، باس، تاماق اۋرۋى، دەنە قىزۋىنىڭ كوتەرىلۋى سەكىلدى سيمپتومداردى بايقاساڭىز، دەرەۋ دارىگەرگە حابارلاسىڭىز» دەپ ەسكەرتەدى مينيستر.
