مۇمكىندىك بولسا كەڭسەدە ەمەس، ۇيدە وتىرىپ جۇمىس ىستەڭىزدەر - ەلجان ءبىرتانوۆ

نۇر- سۇلتان. قازاقپارات - ق ر دەنساۋلىق ساقتاۋ ءمينيسترى ەلجان ءبىرتانوۆ «جەكە كارانتين» جايىندا پىكىر ءبىلدىردى، دەپ حابارلايدى قازاقپارات ءتىلشىسى.

«مەن مينيستر رەتىندە عانا ەمەس، ەڭ الدىمەن كوروناۆيرۋس ەپيدەمياسىنىڭ قاۋىپ- قاتەرىن جاقسى تۇسىنەتىن جانە ازاماتتاردىڭ دەنساۋلىعى ءۇشىن ەرەكشە الاڭداپ جۇرگەن ادام رەتىندە سىزدەرگە ءوتىنىش جاساماقپىن. ءدال قازىر جاۋاپكەرشىلىكتى موينىمىزعا الىپ، ءارقايسىمىز «جەكە كارانتين» ەرەجەلەرىن مۇقيات ۇيرەنەر جانە ونى ءومىر سالتىنا اينالدىرار كەز كەلدى. ال ىندەتتى جۇقتىرىپ الماۋ ءۇشىن قاراپايىم عانا شارالاردى ساقتاساڭىزدار بولعانى»، - دەپ جازدى مينيستر الەۋمەتتىك جەلىدەگى پاراقشاسىندا.

«جۇمىستا، كولىكتە، كوشەدە، دۇكەندە جانە باسقا جەرلەردە مۇمكىندىگىنشە اراقاشىقتىقتى ساقتاڭىز. ەگەر مۇمكىندىك بولسا كەڭسەدە ەمەس، ۇيدە وتىرىپ جۇمىس ىستەۋگە تىرىسىڭىز. تۋىس- دوستارمەن ونلاين، ۆيدەو- قوڭىراۋ جانە وزگە دە جاڭا تەحنولوگيالاردىڭ كومەگىمەن بايلانىس ورناتىڭىز. قوعامدىق ورىندا ماسكا تاعىپ ءجۇرىڭىز، سونداي- اق قولدى كەم دەگەندە 20 سەكۋند سابىنمەن ءجيى جۋىپ، سانيتايزەرمەن ءسۇرتىڭىز. ءوزىڭىزدىڭ جانە وتباسى مۇشەلەرىنىڭ تەمپەراتۋراسىن ءجيى ولشەپ تۇرىڭىز»، - دەپ ءتۇسىندىردى ۆەدومستۆو باسشىسى.

وسى ورايدا ە. ءبىرتانوۆ ءدال وسى شارالار ناۋرىز، ءساۋىر جانە مامىر ايلارىندا توتەنشە جاعداي كەزىندەگى كارانتيندە كوپ كومەكتەسكەنىن اتاپ ءوتتى.

اۆتور: رۋسلان عابباسوۆ