ەلوردادا جاقىندا قانداي ءىرى نىساندار پايدالانۋعا بەرىلەدى

نۇر- سۇلتان. قازاقپارات - ەلوردانىڭ ساۋلەت، قالا قۇرىلىسى جانە جەر قاتىناستارى باسقارماسى جاقىندا شاھاردا پايدالانۋعا بەرىلەتىن جاڭا نىساندار تۋرالى مالىمەت جاريالادى، دەپ حابارلايدى قازاقپارات ءتىلشىسى.

«ولار ەلوردا ءۇشىن ماڭىزدى نىساندار جانە وسى نىساندار بويىنشا قۇرىلىس جۇمىستارى توقتاۋسىز ءجۇرىپ جاتىر. دەگەنمەن پاندەميا كوپتەگەن سالالاردىڭ جۇمىسىن باياۋلاتسا دا، قۇرىلىس باعىتىندا قاجەتتى شارالار قابىلداندى»، - دەدى ەلوردانىڭ ساۋلەت، قالا قۇرىلىسى جانە جەر قاتىناستارى باسقارماسىنىڭ باسشىسى نۇرلان ۋرانحايەۆ.

اتاپ ايتقاندا، تۇران داڭعىلى جانە №26 مەن Е51 كوشەلەرى قيىلىسىندا جەڭىل اتلەتيكالىق سپورت كەشەنى پايدا بولادى. سالىنىپ جاتقان بۇل مانەج 7000 كورەرمەنگە ەسەپتەلگەن. نىسان جوباسى بويىنشا وندا جەڭىل اتلەتيكادان الەمدىك دەڭگەيدەگى جارىستاردى وتكىزۋگە بولادى. عيماراتتا بارلىق ينفراقۇرىلىم قامتىلماق، ونىڭ ىشىندە جەكە قوناق ءۇي دە جاساقتالادى. جەر تەلىمى 9,0843 گەكتار اۋماقتى الىپ جاتىر. نىساندى پايدالانۋعا بەرۋ مەرزىمى 2020 -جىلدىڭ 3 توقسانىنا بەلگىلەنگەن.

23-15 كوشەسى بويىندا، ياعني بايتۇرسىنوۆ پەن ناجىمەدەنوۆ كوشەلەرى ارالىعىندا قازاق دراما تەاترىنىڭ عيماراتى پايدا بولادى. نىساننىڭ جالپى اۋدانى 22853,0 شارشى مەتر شاماسىندا. ۇلكەن زال 640 ورىنعا، ال كىشى زال 202 ورىنعا ارنالعان. عيماراتتىڭ قۇرىلىسى بيىل ءۇشىنشى توقساندا اياقتالادى دەپ كۇتىلۋدە.

قابانباي باتىر مەن ماڭگىلىك ەل داڭعىلدارىنىڭ اراسىندا جاڭا مەشىت سالىنۋدا. رەسپۋبليكا مەن ورتالىق ازياداعى ەڭ ۇلكەن مەشىتتىڭ قۇرىلىسى ق ر تۇڭعىش پرەزيدەنتى - ەلباسى نۇرسۇلتان نازاربايەۆتىڭ تاپسىرماسىنا سايكەس جۇرگىزىلىپ جاتىر. مەشىت 30 مىڭ ادامعا ەسەپتەلگەن. مەشىت مۇنارالارى - 130 مەتر. قۇرىلىس جۇمىستارى 2021 -جىلى اياقتالادى دەپ جوسپارلانۋدا.

اۆتور: رۋسلان عابباسوۆ