دۇنيەجۇزىلىك دەنساۋلىق ساقتاۋ ۇيىمى افريكاداعى جاعدايعا الاڭداۋلى: الەمدە قازىر احۋال قالاي
بۇل - پاندەميا باستالعالى العاش رەت تىركەلىپ وتىرعان جاعداي. كورشى رەسەيدە بۇل كورسەتكىش 10 مىڭنان اسقان جوق. دەگەنمەن جاڭا ناۋقاستاردىڭ سانى از ەمەس. سوڭعى تاۋلىكتە رەسەيدە 9 مىڭعا تارتا دەرەك تىركەلدى. ال دۇنيەجۇزىلىك دەنساۋلىق ساقتاۋ ۇيىمى افريكاداعى جاعدايعا الاڭداۋلى. ويتكەنى قۇرلىقتا ىندەت ءورشىپ بارادى.
ءۇندىستاندا كەشە 24 ساعات ىشىندە 9996 ادام كوروناۆيرۋس جۇقتىرىپ، تاۋلىكتىك رەكورد ورناتىلعان ەدى. الايدا جاعداي كۇن ساناپ ۋشىعىپ بارادى. ونى بۇگىنگى مالىمەتتەر ايعاقتاپ وتىر. ەلدە كوروناۆيرۋستى تاعى 10956 ادام جۇقتىردى. ەلدە العاش رەت تاۋلىكتىك كورسەتكىش 10 مىڭدىق مەجەدەن اسىپ كەتتى. قازىر راستالعان دەرەكتەر سانى 298 مىڭعا جۋىقتايدى. ءسويتىپ، ءۇندىستان ناۋقاستار سانى بويىنشا ۇلى بريتانيادان باسىپ وزىپ، الەمدىك «انتيرەيتينگتە» ءتورتىنشى ورىنعا شىقتى. 298 مىڭ ادامنىڭ شامامەن جارتىسى ايىعىپ شىققانىن ايتا كەتەيىك.
چەل استاناسى نيۋ- دەلي ىندەتتەن قاتتى زارداپ شەككەن وڭىرلەردىڭ ءبىرى سانالادى. مۇندا ۆيرۋستى جۇقتىرعاندار سانى 35 مىڭعا جۋىقتايدى. الايدا ساراپشىلار «بۇل تەك باستاماسى عانا، سۇمدىقتىڭ ءبارى ءالى الدا» دەيدى.
ارۆيند كەدجريۆال، دەليدىڭ باس ءمينيسترى:
- بولجام مىناداي: 15 - شىلدەگە تامان ءبىر عانا دەلي استانالىق ايماعىنىڭ وزىندە ۆيرۋستى جۇقتىرعاندار سانى 225 مىڭعا دەيىن جەتۋى مۇمكىن. ال شىلدەنىڭ اياعىندا بۇل ساننىڭ جارتى ميلليوننان اسىپ كەتەتىن ءتۇرى بار. قازىردىڭ وزىندە اۋرۋحانالاردا ورىن تاپشى. ال شىلدەنىڭ اياعىندا ول ماسەلە تەك ءورشي ءتۇسۋى مۇمكىن.
ناۋقاستاردىڭ كوپتىگىنەن تۇرعىندار دارىگەرلەرلەردىڭ جۇمىسىنا شاعىمدانىپ جاتىر.
نيتيش بحاردۆادج، جەرگىلىكتى تۇرعىن:
- مەنىڭ اكەم كوروناۆيرۋس جۇقتىردى دەگەن كۇدىكپەن كەشە اۋرۋحاناعا ءتۇستى. سول كەزدە دارىگەر ءبىر كەلىپ كەتكەن ەكەن. الايدا كەشەدەن بەرى ول كىسىنى ءبىر دە ءبىر مەديتسينالىق قىزمەتكەرلەر تەكسەرمەپتى. اكەمنىڭ جاسى 60-تا. جۇرەگى اۋىرادى. قازىر دەنە قىزۋى كوتەرىلىپ، جوتەلى باسىلماي تۇر. مەن ول كىسىگە پاراتسەتامول، تەرمومەتر مەن تاماق بەرىپ جىبەردىم.
ۆيرۋستى جۇقتىرعانداردىڭ سانى جارتى ميلليوننان استى ال كورشى ەل رەسەيدە كوروناۆيرۋستى جۇقتىرعانداردىڭ سانى جارتى ميلليوننان اسىپ كەتتى. مۇندا وسى اپتادا ءوزىن- ءوزى وقشاۋلاۋ ءتارتىبى الىنىپ تاستالعان ەدى. ءسويتىپ، كوشەدە جۇرگەن حالىق قاراسى كوبەيىپ، كەپتەلىس پايدا بولعان. سالدارىنان بۇگىن دە، كەشە دە تاۋلىكتىك ءوسىمنىڭ ارتۋى بايقالادى.
ال ماسكەۋ مەرى تۇرعىندارعا سىرتقا شىقپاۋعا كەڭەس بەردى. ويتكەنى ۆيرۋستى جۇقتىرۋ قاۋپى ءالى جوعارى. سونداي- اق قالا باسشىسى وزگە ءوڭىر حالقىن مۇمكىندىگىنشە ماسكەۋگە كەلمەي تۇرۋعا شاقىردى. الايدا بۇعان بىرەۋ قۇلاق اسسا، ەندى بىرەۋلەر ەلەمەي جاتقان كورىنەدى. بيىل مامىردا ماسكەۋدە كوز جۇمعاندار سانى بىلتىرمەن سالىستىرعاندا 30 پروتسەنتكە جوعارى بولىپ شىقتى. قايعىلى وقيعالاردىڭ 92 پروتسەنتى كوروناۆيرۋسقا بايلانىستى.
وسى رەتتە دارىگەرلەر ىندەتتى جۇقتىرۋ قاۋپى ءالى جوعارى ەكەنىن ەسكەرتەدى. سوعان قاراماستان مۇندا 24 - ماۋسىمدا جەڭىس كۇنىنە ارنالعان پاراد، 1 - شىلدەدە رەفەرەندۋم وتەدى. ال بۇل شارالارعا ادام كوپ جيىلاتىنى ايتپاسا دا تۇسىنىكتى.
ال دۇنيەجۇزىلىك دەنساۋلىق ساقتاۋ ۇيىمى افريكاداعى احۋالعا الاڭداۋلى. بۇل قۇرلىق وسى كۇنگە دەيىن كوروناۆيرۋستان ەڭ از زارداپ شەككەن وڭىرلەردىڭ ءبىرى سانالىپ كەلدى. الايدا سوڭعى ۋاقىتتا جاعداي كۇرت وزگەرىپ بارادى. مۇندا ۆيرۋس تەز تاراپ جاتىر.
ماتشيديسو موەتي، د د س ۇ افريكاداعى ايماقتىق بيۋروسىنىڭ ديرەكتورى:
- افريكادا قازىر كوروناۆيرۋستى جۇقتىرعانداردىڭ سانى 200 مىڭنان اسادى. 5 مىڭ ادام كوز جۇمعان. قۇرلىقتارعى دەرەكتەر سانى 100 مىڭعا جەتۋ ءۇشىن 98 كۇن كەتكەن ەدى. ال سوڭعى دەرەكتەر، ياعني تاعى 100 مىڭى نەبارى 19 كۇن ىشىندە تىركەلدى. بۇل ۆيرۋستىڭ تەز تارالىپ جاتقانىن كورسەتەدى.
افريكادا مەديتسينالىق قۇرالدار جەتىسپەي جاتىر. تەستتەر دە تاپشى. سول سەبەپتى ۆيرۋستى جۇقتىرعانداردىڭ سانى الدەقايدا كوپ بولۋى مۇمكىن دەگەن بولجامدى جوققا شىعارۋعا بولمايدى.
دۇنيەجۇزىلىك دەنساۋلىق ساقتاۋ ۇيىمىن الاڭداتىپ وتىرعان تاعى ءبىر ماسەلە بار. بۇل - ەبولا بەزگەگى. بىلتىر كونگو دەموكراتيالىق رەسپۋبليكاسىندا وسى ىندەتكە بايلانىستى دۇنيەجۇزىلىك دەنساۋلىق ساقتاۋ ۇيىمى توتەنشە جاعداي جاريالاۋعا ءماجۇر بولعان. ال تاقاۋدا ەلدە جاڭا وقيعالار تىركەلگەن. سوندىقتان ماماندار ەبولا بەزگەگى قايتادان ءورشىپ كەتە مە دەپ الاڭداپ وتىر. ساراپشىلاردىڭ كۇدىگى راستالسا، افريكاداعى احۋالدىڭ قاتتى ءورشىپ كەتەتىن ءتۇرى بار.
www.24.kz
