كۇيەۋ بالاسىن ولتىرگەن بەلگىلى بوكسشى قىلمىستىق جاۋاپكەرشىلىكتەن بوساتىلدى

قوستاناي. قازاقپارات - قوستانايدا بەلگىلى بوكسشى اسلان مۇقانوۆقا قاتىستى سوت ءىسى قارالدى، دەپ حابارلايدى قازاقپارات وبلىستىق سوتتىڭ باسپا ءسوز قىزمەتىنە سىلتەمە جاساپ.

ەسكە سالا كەتەيىك، بوكسشى اسلان مۇقانوۆ 2019 -جىلعى شىلدە ايىندا قاماۋعا الىنعان. وعان ءوزىنىڭ كۇيەۋ بالاسىن ولتىرگەنى ءۇشىن ق ر ق ك 99-بابى بويىنشا قىلمىستىق ءىس قوزعالدى. بۇگىن قىلمىستىق ءىس بويىنشا مامانداندىرىلعان اۋدانارالىق سوتتا بوكسشى قىلمىستىق جاۋاپتان بوساتىلدى.

«وتكەن جىلدىڭ شىلدە ايىندا قارىنداسىنىڭ كۇيەۋىن ءولتىردى دەگەن كۇدىكپەن سپورتشى قولعا ءتۇستى. بۇگىن قىلمىستىق ىستەر جونىندەگى مامانداندىرىلعان سوتتا وعان ۇكىم شىقتى. سوت ونى اقىل- ەسى دۇرىس ەمەس دەپ تانىدى.

«سوت اسلان ساپارعالي ۇلى مۇقانوۆتىڭ قابىلەتسىز جاعدايدا قازاقستان رەسپۋبليكاسى قىلمىستىق كودەكسىنىڭ 99-بابى 2-بولىگىنىڭ 3-تارماعىندا كورسەتىلگەن قىلمىستىق ارەكەتتى جاساعانىن دالەلدەدى. ونى ىسكە قابىلەتسىز دەپ تانۋ تۋرالى قاۋلى شىعارىلدى. مۇقانوۆ ق ر ق ك 16-بابى نەگىزىندە قوعامعا قاۋىپتى ارەكەتتى جاساعان كەزدە ەسى كىرەسىلى- شىعاسىلى جاعدايدا بولۋىنا بايلانىستى قىلمىستىق جاۋاپتان بوساتىلىپ وتىر» دەلىنگەن سوت ۇكىمىندە.

اسلان مۇقانوۆقا الماتى وبلىسىنداعى سوت- پسيحياتريالىق ستاتسيونارىندا ماجبۇرلەپ ەمدەۋ شاراسى بەكىتىلدى. بوكسشىنىڭ سوزىلمالى پسيحيكالىق اۋرۋى بارى انىقتالدى. ول قىلمىس كەزىندە ءوز ءىس- ارەكەتىنە جاۋاپ بەرمەگەنىن ايتتى.

اۆتور: قاسقىرباي قويشىمانوۆ