قاراعاندى وبلىسىندا كارانتين كۇشەيتىلەدى
قاراعاندى وبلىسىندا 13-ماۋسىمنان باستاپ كەيبىر كارانتيندىك شارالار جاڭارتىلىپ، قوعامدىق جانە ساۋدا وبەكتىلەرىنىڭ جۇمىس ۋاقىتى شەكتەلەدى. بۇل تۋرالى قاراعاندى وبلىسىنىڭ اكىمى جەڭىس قاسىمبەك مالىمدەدى، دەپ حابارلايدى وبلىس اكىمدىگىنىڭ رەسمي سايتى.
قاراعاندى وبلىسىندا سوڭعى اپتادا 303 سيمپتومسىز ۆيرۋس تاسىمالداۋشى انىقتالعان. ال وتكەن تاۋلىكتە 52 ناۋقاس تىركەلدى. سىرقاتتانعانداردىڭ باسىم بولىگى وتباسىلىق ءىس-شارالاردان كەيىن انىقتالعان.
«ادامدار ءوزىن-ءوزى وقشاۋلاۋ، الەۋمەتتىك قاشىقتىق جانە باسقا دا سانيتارلىق ۇسىنىستاردى بۇزۋدى جالعاستىرۋدا. ق ر باس مەملەكەتتىك سانيتارلىق دارىگەرىنىڭ تالاپتارىنا سايكەس، ەگەر وڭىردە اۋرۋشاڭدىقتىڭ ءوسىمى 7 پايىزدان اسسا، كارانتيندىك شارالار قايتا جانداندىرىلادى. ءبىزدىڭ وبلىستا بۇل كورسەتكىش - 7,3 پايىز. سوندىقتان 13-ماۋسىمنان باستاپ بەلگىلى ءبىر شەكتەۋلەر قابىلدانادى»، - دەدى وبلىس اكىمى.
13-ماۋسىمنان باستاپ جەزقازعان، قارقارالى اۋدانى، شەت اۋدانىنىڭ جارىق كەنتى قورشالادى جانە بلوك- بەكەتتەر ورناتىلادى. مەملەكەتتىك ورگاندار مەن بيۋدجەتتىك ۇيىمدار
قىزمەتكەرلەرىنىڭ %70 ى قاشىقتان جۇمىس رەجيمىنە كوشىرىلەدى. قوعامدىق جانە ساۋدا وبەكتىلەرىنىڭ جۇمىس ۋاقىتى شەكتەلەدى.
«قۇرمەتتى قاراعاندىلىقتار! مەن وسى كۇردەلى كەزەڭدە ءوز-ءوزىمىزدى جانە جاقىندارىمىزدى بارىنشا قاۋىپسىزدەندىرۋ ءۇشىن سانالىق تانىتاتىن جانە شارالار قولداناتىن بارلىق ادامدارعا العىسىمدى بىلدىرەمىن. بارلىقتارىڭىزدى سابىرلىق تانىتۋعا شاقىرامىن. جاقىن ارادا ۇيرەنشىكتى ءومىر سالتىمىزعا ورالۋ تەك ءسىز بەن ءبىزدىڭ ارەكەتتەرىمىزگە بايلانىستى»، - دەدى جەڭىس قاسىمبەك.
