اكىمدەرگە كارانتين شارالارىن كۇشەيتۋدى قاراستىرۋ تاپسىرىلدى
ق ر پرەمەر- ءمينيسترىنىڭ ورىنباسارى ەرالى توعجانوۆتىڭ توراعالىعىمەن وتكەن كوروناۆيرۋس ينفەكسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ كەزەكتى وتىرىسىندا ەلىمىزدەگى قازىرگى ەپيدەميولوگيالىق احۋال، حالىقتى جەكە قورعانۋ قۇرالدارىمەن قامتاماسىز ەتۋ، حالىقارالىق اۋە قاتىناستىرىن كەزەڭ- كەزەڭمەن اشۋ جانە باسقا دا وزەكتى ماسەلەلەر قارالدى. ق ر دەنساۋلىق ساقتاۋ ۆيتسە- ءمينيسترى ليۋدميلا بيۋرابەكوۆا ءوز بايانداماسىندا حالىق اراسىندا سانيتارلىق ءتارتىپتىڭ ساقتالماۋىنىڭ كەسىرىنەن ەلىمىزدە كوروناۆيرۋس جۇقتىرعاندار سانى ارتىپ كەلە جاتقانىن اتاپ ءوتتى.
«اۋرۋ اداممەن بايلانىستا بولعانداردىڭ اراسىندا ۆيرۋستى جۇقتىرعاندار سانى ارتتى، ونىڭ ىشىندە ءبىر وتباسى مۇشەلەرى اراسىندا سىرقاتتانۋ جاعدايى كوپ تىركەلۋدە. وتكەن ەكى اپتادا كوروناۆيرۋستى جۇقتىرعانداردىڭ جارتىسىنا جۋىعى ۇجىمدارعا قاتىستى بولىپ وتىر»، - دەدى ول.
وسىعان وراي، پرەمەر- ءمينيستردىڭ ورىنباسارى ىندەتكە شالدىعۋ سانى ارتىپ وتىرعان وڭىرلەردىڭ اكىمدىكتەرىنە كارانتين شارالارىن كۇشەيتۋ ماسەلەلەرىن قاراستىرۋدى تاپسىردى. ءوڭىر اكىمدىكتەرى سانيتارلىق- ەپيدەميولوگيالىق تالاپتاردىڭ ساقتالۋىن باقىلايتىن مونيتورينگىلىك توپتاردىڭ جۇمىسىن كۇشەيتۋدى، تالاپتاردى ورىنداماعان وبەكتىلەردىڭ قىزمەتىن انىقتالعان كەمشىلىكتەر جويىلعانشا ۋاقىتشا توقتاتۋ بويىنشا ناقتى شارالار قابىلداۋدى قولعا الۋى قاجەت.
مەملەكەتتىك ورگان باسشىلارىنا ۇجىمنىڭ %80 قاشىقتان جۇمىس ىستەۋ تارتىبىنە اۋىستىرۋ ۇسىنىلدى. كەڭەس قورىتىندىسى بويىنشا پرەمەر- ءمينيستردىڭ ورىنباسارى ە. توعجانوۆ بىرنەشە ناقتى تاپسىرمالار بەردى.
ايتا كەتەيىك، بۇگىنگە دەيىن قازاقستاندا كوروناۆيرۋس 13558 ادامنان انىقتالدى. ونىڭ ىشىندە جازىلىپ شىققاندار سانى – 8400، قايتىس بولدى - 67 ناۋقاس.
