ءبىز ەكونوميكانىڭ ينۆەستيتسيالىق باسەكەگە قابىلەتتىلىگىن ارتتىرامىز - اسقار مامين
ينۆەستيتسيالىق ساياساتتى ىسكە اسىرۋ، ەنەرگەتيكا، ەكولوگيا جانە مۇناي- گاز سالاسى، ەڭبەك زاڭناماسى، ادام كاپيتالىن دامىتۋ جانە شەتەلدىك جۇمىس كۇشىن تارتۋ ماسەلەلەرى جونىندەگى ش ي ك بىرلەسكەن جۇمىس توپتارىنىڭ قىزمەتى تۋرالى «EY « كومپانياسىنىڭ قازاقستان جانە ورتالىق ازيا بويىنشا باسقارۋشى سەرىكتەسى ە. دوسىمبەكوۆ، «ادجيپ كاسپيان سي بي ۆي» باسقارۋشى ديرەكتورى ن. اگگودجەري جانە قازاقستانداعى «شەلل» كونسەرنىنىڭ ءتوراعاسى و. لازار باياندادى.
وتىرىستا ش ي ك-تىڭ 32- جالپى وتىرىسىنىڭ حاتتامالىق تاپسىرمالارىنىڭ ىسكە اسىرىلۋ بارىسى جانە بيىل وتەتىن «شيكىزاتتىق ەمەس ەكسپورتتى دامىتۋ» تاقىرىبىنداعى كەڭەس وتىرىسىنا دايىندىق ماسەلەسى قارالدى.
ق ر سىرتقى ىستەر ءمينيسترى مۇحتار تىلەۋبەردى، ق ر ساۋدا جانە ينتەگراتسيا ءمينيسترى باقىت سۇلتانوۆ، شەتەل تاراپىنان بىرلەسكەن وتىرىستاردى دايىنداۋ جونىندەگى كەڭەستىڭ جۇمىس توبىنىڭ تەڭ ءتوراعاسى، «سيتيبانك قازاقستان» باسقارماسىنىڭ ءتوراعاسى ا. كۋريلين بايانداما جاسادى.
پرەمەر- مينيستر ۇكىمەت قابىلداپ جاتقان شارالار مەن ۇلتتىق ەكونوميكادا جيناقتالعان تۇراقتىلىق ەكونوميكانىڭ ناقتى سەكتورى ءوسىمىنىڭ سەنىمدى سەرپىنىن قامتاماسىز ەتۋگە، نەگىزگى كاپيتالعا سالىنعان ينۆەستيتسيالار مەن قىزمەت كورسەتۋ سەكتورىنداعى ىسكەرلىك بەلسەندىلىكتى قالپىنا كەلتىرۋگە جول اشقانىن اتاپ ءوتتى. وسى جىلدىڭ 5 ايىندا تاۋ-كەن ءوندىرۋ ونەركاسىبىندە كولەم %5,2 عا، وڭدەۋ ونەركاسىبىندە %4,9 عا ءوستى.
ءساۋىر ايىمەن سالىستىرعاندا مامىردا ساۋدا %28,3 عا، كولىك سەكتورى - %20,7 عا، نەگىزگى كاپيتالعا سالىنعان ينۆەستيتسيالار كولەمى - %32 عا ءوستى. ۇكىمەت باسشىسى ازىرلەنىپ جاتقان 2025 -جىلعا دەيىنگى ق ر ستراتەگيالىق دامۋ جوسپارى باسەكەگە قابىلەتتى شيكىزاتتىق ەمەس سەكتوردى دامىتۋعا، ساپالى ينۆەستيتسيالار مەن قوسىلعان قۇننىڭ وڭىرلىك جانە جاھاندىق تىزبەگىنە قوسىلۋعا باسا نازار اۋدارا وتىرىپ، ەكونوميكانىڭ جاڭا قۇرىلىمىن قالىپتاستىرۋعا باعىتتالعانىن اتاپ ءوتتى.
«ينۆەستيتسيالار جاڭا جوسپاردىڭ ماڭىزدى ەلەمەنتتەرىنىڭ ءبىرى رەتىندە قاراستىرىلادى. ءبىز ەكونوميكانىڭ ينۆەستيتسيالىق باسەكەگە قابىلەتتىلىگىن، ينۆەستيتسيالىق زاڭنامانىڭ تۇراقتىلىعىن ارتتىرۋ، قازاقستاندىق بيزنەس پەن ق ر-داعى شەتەلدىك ينۆەستورلاردىڭ ىسكەرلىك بەلسەندىلىگىن ارتتىرۋ ءۇشىن قولايلى جاعداي جاساۋ بويىنشا شارالاردى ودان ءارى قابىلدايمىز»، - دەدى ا. مامين.
كەڭەستىڭ شەتەلدىك مۇشەلەرىنىڭ تۇراقتى وكىلدەرىمەن قاتار، ءىس-شاراعا ۇكىمەت مۇشەلەرى، ۇلتتىق بانك، باس پروكۋراتۋرا، «اتامەكەن» ۇ ك پ جانە «بايتەرەك» ۇ ب ح» ا ق، «Qazindustry» قازاقستاندىق يندۋستريا جانە ەكسپورت ورتالىعى» ا ق، «Kazakh Export» ە س ك» ا ق جانە ت. ب. باسشىلارى قاتىستى.
