مينيسترلىك قوعامدا ءتۇرلى پىكىر تۋدىرعان شوشقا سۋبسيدياسىنىڭ ءمان-جايىن ءتۇسىندىردى

نۇر-سۇلتان. قازاقپارات – ق ر اۋىل شارۋاشىلىعى مينيسترلىگى سوڭعى ۋاقىتتا قوعامدا كەڭىنەن تالقىعا تۇسكەن شوشقا ەتىن وندىرۋگە سۋبسيديا بەرۋ ماسەلەسىنە قاتىستى ءمان-جايدى ءتۇسىندىردى، دەپ حابارلايدى قازاقپارات ءتىلشىسى.

«قوعامدا ءتۇرلى پىكىر تۋدىرعان تاقىرىپ بويىنشا مىنانداي اقپارات ۇسىنامىز. مەملەكەت ءارقاشان ەكونوميكالىق تۇرعىدان ءتيىمدى بولۋ ءۇشىن كورشىلەس ەلدەردىڭ سۇرانىسىنا ءمان بەرىپ، نارىقتاعى تۇتىنۋشى تالابىن ەسكەرەدى. قازاقستاندا 2018 -جىلدان باستاپ شوشقا ەتىن ءوندىرۋدى سۋبسيديالاۋ توقتاتىلعان. بۇل شوشقا وندىرىسىنە مەملەكەتتىك قولداۋدىڭ جالپى كولەمىنىڭ 2 ەسە ازايعانىن كورسەتەدى. قازىرگى ۋاقىتتا سالادا تەك ەكى سۋبسيديا بار: اسىلداندىرۋ مەن وسىرۋگە كەتكەن شىعىنداردى وتەۋ. الايدا، وتكەن جىلى بۇل سۋبسيديانى تەك ءبىر شارۋا قوجالىعى عانا پايدالانىپ، نەبارى 6 باس مال الىندى»، - دەدى مينيسترلىكتەن.

ۆەدومستۆو مالىمەتىنشە، 1991 -جىلى قازاقستاندا 2,9 ميلليون باس شوشقا بولسا، ال 2018 -جىلى ونىڭ سانى 800 مىڭعا دەيىن ازايعان.

«2019 -جىلعا قاراي قازاقستانداعى شوشقا سانىنىڭ ارتۋى شوشقا ەتى ەكسپورتىنىڭ وسۋىنە اسەر ەتتى. ەگەر 2017 -جىلى قازاقستان شەتەلگە 300 تونناعا جۋىق ەت ساتسا، بىلتىر ول 800 تونناعا جەتتى. وسى كەزەڭ ىشىندە شوشقا ەتىنىڭ ىشكى تۇتىنۋ ۇلەسى 8 پايىزعا تومەندەدى»، - دەلىنگەن تاراتىلعان اقپاراتتا.