ادامنىڭ اعزاسىن قانداي جاعدايدا ەل اۋماعىنان شىعارۋعا بولادى
بۇل تۋرالى ق ر پارلامەنتى سەناتىنىڭ جالپى وتىرىسىندا ق ر دەنساۋلىق ساقتاۋ ءمينيسترى ەلجان ءبىرتانوۆ ايتتى، دەپ حابارلايدى قازاقپارات ءتىلشىسى.
«كودەكستىڭ جوباسىن تالقىلاۋ بارىسىندا پارلامەنت ءماجىلىسىنىڭ جۇمىسى اياسىندا جۇرتشىلىقتىڭ پىكىرىن ەسكەرە وتىرىپ، كەي داۋلى نورمالار پىسىقتالدى. ولار بويىنشا كونسەنسۋس تابىلدى. كودەكس جوباسىندا قازاقستان اۋماعىنان ادامنىڭ اعزاسى مەن تىندەرى تەك قانا قر ازاماتتارىنا مەديتسينالىق كومەك كورسەتۋ ءۇشىن شىعارىلاتىن بولدى»، - دەدى «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكس پەن «كەيبىر زاڭنامالىق اكتىلەرگە دەنساۋلىق ساقتاۋ ماسەلەلەرى بويىنشا تۇزەتۋ ەنگىزۋ جونىندە» ىلەسپە زاڭ جوباسىن تانىستىرعان مينيستر.
ونىڭ اتاپ وتۋىنشە، قايتىس بولعان ادامنىڭ ورگاندارىن الۋعا كەلىسىم پرەزۋمپتسياسىنا قاتىستى نورما قازاقستان رەسپۋبليكاسىندا 2009 -جىلدان باستاپ قولدانىستا.
«ەرىكتى تۇردە كەلىسىم بەرۋدى تىركەۋ نەمەسە كەلىسىمدى كەرى قايتارىپ الۋ مەديتسينالىق ۇيىمدار كورسەتەتىن مەملەكەتتىك قىزمەت بولىپ سانالادى. كودەكس جوباسىندا ادامنىڭ ءتىرى كەزىندە اعزاسىن الۋ بويىنشا ەرىك بىلدىرمەگەن جاعدايدا كەلىسىمدى بەرمەۋگە جۇبايىنىڭ، ال ول بولماعان جاعدايدا جاقىن تۋىستارىنىڭ ءبىرىنىڭ قۇقىعى بار ەكەنى كوزدەلگەن»، - دەدى ەلجان ءبىرتانوۆ.
