استانادا جۋرناليستەردىڭ بەيبىت جينالىستاردا قىزمەت ەتۋ قاعيدالارى تالقىلانۋدا

نۇر-سۇلتان. قازاقپارات - اقپارات جانە قوعامدىق دامۋ ءمينيسترى ايدا بالايەۆا ب ا ق باسشىلارىمەن، باس رەداكتورلارمەن ونلاين-كەزدەسۋ وتكىزىپ جاتىر، دەپ حابارلايدى قازاقپارات ءتىلشىسى.

«باس رەداكتورلار كلۋبى» قوعامدىق بىرلەستىگىنىڭ باستاماسىمەن وتكىزىلىپ جاتقان ونلاين- كەزدەسۋگە ب ا ق باسشىلارى، ءتۇرلى مەملەكەتتىك جانە ايماقتىق ب ا ق قۇرالدارىنىڭ باس رەداكتورلارى مەن ازاماتتىق قوعام وكىلدەرى، مينيسترلىكتىڭ قىزمەتكەرلەرى دە قاتىسۋدا.

«بۇگىن بەيبىت جينالىستار كەزىندەگى جۋرناليستەردىڭ جۇمىسىن تالقىلايمىز. ءسوز جوق، بۇل ماسەلە قازىرگى تاڭدا وتە وزەكتى. بۇگىن كونسترۋكتيۆتى ديالوگ بولارىنا سەنەمىز»، - دەدى ايدا بالايەۆا ونلاين كەزدەسۋ بارىسىندا.

مينيستر 2020 -جىلدىڭ 25-مامىرىندا مەملەكەت باسشىسى بەيبىت جينالىستاردى ۇيىمداستىرۋ مەن وتكىزۋ تۋرالى زاڭعا قول قويعانىن ەسكە سالدى.

«بۇل زاڭنامانىڭ جاڭاشىلدىعى - بەيبىت جينالىستار كەزىندەگى جۋرناليستەردىڭ جۇمىسى. بۇل جەردە قانداي دا ءبىر شەكتەۋ تۋرالى ءسوز قوزعالىپ وتىرعان جوق. ەڭ ءبىرىنشى كەزەكتە جۋرناليستەردىڭ جۇمىسىنا جايلى جاعداي جاساۋ كەرەك. سونىمەن قاتار ەرەجەلەردى دايارلاۋ بارىسىندا ءبىز UNESCO- نىڭ كەڭەستەرىنە قۇلاق استىق»، - دەدى ايدا بالايەۆا.

ايدا بالايەۆا قاعيدالاردىڭ نەگىزگى ەرەجەلەرىنە نازار اۋدارۋعا شاقىردى.

«بىرىنشىدەن جۋرناليستىڭ كاسىبي قىزمەتىن قامتاماسىز ەتۋ ماقساتىندا جەرگىلىكتى اتقارۋشى ورگاندار باسپا ءسوز ورتالىقتارىنا ارنالعان ورىنداردى قامتاماسىز ەتەدى. اتالعان باسپا ءسوز ورتالىقتارى كەلەسى جاعدايلاردا ۇيىمداستىرىلاتىنىن اتاپ وتكەن ءجون. ءبىرىنشى - بەيبىت جينالىسقا قاتىسۋشىلاردىڭ سانى 200 ادامنان اسقان جاعدايدا. ەكىنشى – ب ا ق-تىڭ جەرگىلىكتى اتقارۋشى ورگاندارعا جاساعان سۇراۋى بويىنشا. دەگەنمەن جۋرناليستەردىڭ ءوز قىزمەتىن اتقارۋى - تەك وسى باسپا ءسوز ورتالىعىمەن شەكتەلىپ قالمايدى»، - دەدى مينيستر.

ول سونىمەن قاتار جەدەل باسپا ءسوز ورتالىقتارىنا ءبىرىڭعاي تالاپ قويىلاتىنىن اتاپ ءوتتى. «ماسەلەن ولار ءتيىستى ماتەريالدىق- تەحنيكالىق جابدىقتاردى، ەلەكترمەن قولجەتىمدىلىكتى، اقپاراتتى بەرە الاتىنداي جاعدايدى، شەكتەۋشى لەنتالاردى، فوتو نەمەسە ۆيدەوتۇسىرىلىم جۇرگىزە الاتىنداي جاعدايدى قامتاماسىز ەتۋى كەرەك. جۋرناليستەردىڭ قاۋىپسىزدىگىن قامتاماسىز ەتۋ ءۇشىن مۇنداي ورىنداردا ىشكى ىستەر ورگاندارىنىڭ قىزمەتكەرلەرىن تۇرعىزۋ ۇسىنىلادى»، - دەدى ول. مينيستر سونىمەن بىرگە ب ا ق پەن جەرگىلىكتى اتقارۋشى ورگانداردىڭ ءوزارا ءىس-قيمىلىنىڭ ءتارتىبى ەنگىزىلەتىنىن ايتىپ ءوتتى.

«جەرگىلىكتى اتقارۋشى ورگان ءوز وكىلىنىڭ بەيبىت جينالىسقا قاتىسۋىن قامتاماسىز ەتەدى. وكىلدىڭ قىزمەتى - جۋرناليستەردىڭ قاۋىپسىزدىگىن قامتاماسىز ەتۋگە باعىتتالعان شارالاردى ءتۇسىندىرۋ. جۋرناليستەرگە بەيبىت جينالىستىڭ قاتىسۋشىلارى مەن ۇيىمداستىرۋشىلارىنان سۇحبات الۋعا جاردەمدەسۋ. قاجەت بولعان جاعدايدا بەيبىت جينالىستا كوتەرىلگەن ماسەلەلەر بويىنشا جۇكتەمە الۋ ءۇشىن مەملەكەتتىك ورگانداردىڭ باسپا ءسوز حاتشىلارىمەن بايلانىس دەرەكتەرىن ۇسىنۋ»، - دەدى ول.

ايدا بالايەۆا جۋرناليستەردىڭ ايىرىم بەلگىلەرىن تاڭداۋ – ب ا ق-تىڭ وزىندە قالاتىنىن ايتادى.

«ياعني قاعيدادا ۇسىنىلعان ءبىر نەمەسە بىرنەشە ەرەكشەلىك بەلگىلەرىن پايدالانۋعا بولادى. بۇل كەۋدەشە، جەڭگەتاڭعىش، جەڭىل جەيدە نەمەسە ارقاعا جاپسىرما بولۋى مۇمكىن»، - دەدى ايدا بالايەۆا.