قاسىم-جومارت توقايەۆ پرەزيدەنتتىگىنە ءبىر جىل: ارمەنيا ساراپشىلارىنىڭ پىكىرى

ەرەۆان. قازاقپارات - ارمەنيا پرەزيدەنتىنىڭ كەڭەسشىسى، حالىقارالىق ادامي دامۋ ورتالىعىنىڭ ديرەكتورى تەۆان پوگوسيان جانە ساياسي شولۋشى ايك حالاتيان قاسىم-جومارت توقايەۆتىڭ قازاقستان پرەزيدەنتى قىزمەتىندەگى نەگىزگى قادامدارى جونىندە پىكىر ءبىلدىردى، دەپ حابارلايدى قازاقپارات ءتىلشىسى.

تيەۆان پوگوسياننىڭ پىكىرىنشە، ق. توقايەۆتىڭ ءبىر جىلدىق قىزمەتىندە قازاقستان ءوزىنىڭ ەۆوليۋتسيالىق بيلىك ساباقتاستىعى مودەلىن كورسەتە الدى. بۇل ۋاقىتتا مەملەكەت باسشىسى ءوزىن كەلىسسوز جۇرگىزە الاتىن، بارلىعىن تىڭداپ، شەشىم قابىلداي الاتىن ادام رەتىندە كورسەتتى.

تەۆان پوگوسيان ءبىر جىلدا سىرتقى ساياساتتىڭ جاڭا تۇجىرىمداماسى قابىلدانعانىن، وندا 2030 -جىلعا دەيىنگى باسىمدىقتار كورسەتىلگەنىن اتاپ ءوتتى.

«جاڭا تۇجىرىمدامادا سىرتقى ساياساتتىڭ ەكونوميكالىق قۇراۋشىسىن كۇشەيتۋگە كوڭىل بولىنگەن، ونىڭ باستى ماقساتى - مەملەكەت مۇددەسىن قورعاۋ. بۇل مۇددەلەردىڭ اراسىندا قاۋىپسىزدىك، ەنەرگەتيكا، ەكونوميكا كومپونەنتتەرى بار. ارينە، قازاقستان جاڭا تابىس كوزدەرى مەن ەكونوميكالىق مۇمكىندىكتەردى ىزدەيدى. بۇل - تۇراقتى پروتسەسس، اسىرەسە كوروناۆيرۋس پاندەمياسى كەزىندە بارلىق ەلدە ازىق- تۇلىك قاۋىپسىزدىگى ماسەلەسى وزەكتى بولا ءتۇستى. جاڭا جاھاندىق گەوەكونوميكالىق جاعدايدا قازاقستان جاڭا ەكونوميكالىق مۇمكىندىكتەر مەن تابىس كوزدەرىن نىق سەنىممەن ىزدەستىرۋدە»، - دەدى ت. پوگوسيان.

ءوز كەزەگىندە ارميان ساياسي شولۋشىسى ايك حالاتيان قاسىم-جومارت توقايەۆتىڭ ءبىر جىلدا ايتۋلى تابىستارعا قول جەتكىزگەنىن اتاپ ءوتتى. «وتكەن جىلداعى باستى جەتىستىكتەردىڭ ءبىرى رەتىندە ەلدەگى ساياسي جانە ەكونوميكالىق تۇراقتىلىقتى ساقتاي وتىرىپ جۇرگىزىلگەن بيلىك ءترانزيتىن ايتۋعا بولادى.

قازاقستاننىڭ ىشكى ەرەكشەلىكتەرىن ەسكەرسەك، بۇل - وتە ماڭىزدى. ەلدىڭ ورنالاسقان اۋماعى دا كۇردەلى ءارى پروبلەمالىق ايماق سانالادى، ونىڭ ۇستىنە ورتالىق ازياعا ىقپال جۇرگىزۋدە جاھاندىق ويىنشىلار كۇرەسى ءجۇرىپ جاتىر. الايدا، وسىعان قاراماستان، قازاقستان قاسىم-جومارت توقايەۆتىڭ جەتەكشىلىگىمەن رەسەي، ا ق ش، قىتاي، ەو جانە ايماقتاعى كورشى ەلدەرمەن قارىم-قاتىناستى جوعارى دەڭگەيدە ساقتاپ، پراگماتيكالىق جانە كوپۆەكتورلى ساياساتىن جالعاستىرىپ كەلەدى»، - دەدى ايك حالاتيان.

سونىمەن بىرگە، ايك حالاتيان قازاقستاننىڭ الەۋمەتتىك ماسەلەلەرگە جانە قوعاممەن ديالوگقا باسا كوڭىل ءبولىپ وتىرعانىن ايتتى. بۇل رەتتە ساياسي شولۋشى «حالىق ۇنىنە قۇلاق اساتىن مەملەكەت» تۇجىرىمداماسىن، ونىڭ اياسىندا ۇلتتىق قوعامدىق سەنىم كەڭەسى مەن پرەزيدەنتتىڭ ۆيرتۋالدى قابىلداۋ ءبولىمى قۇرىلعانىن ەسكە سالدى.

«وعان قوسا، قاسىم-جومارت توقايەۆتىڭ جەتەكشىلىگىندەگى قازاقستاندىق بيلىكتىڭ كوروناۆيرۋس ينفەكتسياسىنىڭ جاڭا تۇرىمەن ءتيىمدى كۇرەس جۇرگىزگەنىن ايتۋ كەرەك. ينفەكسيامەن ءتيىمدى كۇرەس جۇرگىزۋ - مەملەكەتتىك اپپاراتتىڭ جوعارى اتقارۋ ءتارتىبىنىڭ جاقسى كورسەتكىشى دەپ ەسەپتەيمىن»، - دەدى ا. حالاتيان.

اۆتور: ايجان سەرىكجان قىزى