12:10, 10 - ماۋسىم 2020 | GMT +6
«سۇر اڭگىمە» اتتى جيناق جارىق كوردى
نۇر-سۇلتان. قازاقپارات - قازاق پروزاسىندا وزىندىك قولتاڭباسىمەن ەرەكشەلەنىپ، ستيلى مەن تاسىلدەرى توسىن اڭگىمەلەرى ارقىلى تالعامپاز وقىرمانداردىڭ وڭ باعاسىن الىپ جۇرگەن جاس جازۋشى، «قازاقپارات» ح ا ا «ادەبيەت پورتالى» ينتەرنەت جوباسىنىڭ جەتەكشىسى نۇرلان قابدايدىڭ «سۇر اڭگىمە» اتتى تىرناقالدى جيناعى جارىق كوردى.
نۇر-سۇلتان قالاسىنداعى «ورنەك» باسپاسىندا باسىلىپ شىققان بۇل كىتاپقا جازۋشىنىڭ ءار كەزدە جازىلعان اڭگىمەلەرى مەن شەتەل ادەبيەتىنەن اۋدارمالارى قامتىلعان. اڭگىمە جازۋ - قىسقا- نۇسقالىقتى، از ارقىلى كوپتى قامتۋدى، كومپوزيتسيالىق جيناقىلىقتى، اسىرەسە، ءتىل شەبەرلىگىن قاجەت ەتەدى. ءومىردىڭ وزىنەن ويىپ الىنعان ءتۇرلى وقيعالار مەن جاعداياتتارعا قۇرىلعان ءاربىر اڭگىمە وقىرماندى بەي- جاي قالدىرمايتىنى انىق.
«از جازساڭ دا، ساز جاز» دەيتىن پرينتسيپتى ۇستاناتىن جازۋشىنىڭ بۇل جيناعىنا 19 اۆتورلىق، 5 اۋدارما اڭگىمە قامتىلعان. «قازاقپارات» حالىقارالىق اقپارات اگەنتتىگى نۇرلان قابداي ۇلىن تىرناقالدى تۋىندىسى جارىق كورۋىمەن قۇتتىقتاي وتىرىپ، شىعارماشىلىق تابىس تىلەيدى.
