نۇرجول سۋبۇرقاعىندا باتىرحان شۇكەنوۆ پەن ديماش قۇدايبەرگەن اندەرىنىڭ اۋەنى وينالادى
بۇل تۋرالى ەسىل اۋدانىنىڭ اكىمى بەرىك جاكەنوۆ Facebook پاراقشاسىندا جازدى، دەپ حابارلايدى قازاقپارات ءتىلشىسى.
«تاياۋ ۋاقىتتا ءبارىمىزدىڭ سۇيىكتى سۋبۇرقاعىمىز جاڭاشا اۋەن وينايتىن بولادى. 15-ماۋسىمعا دەيىن نۇرجول جەلەكجولىنداعى مۋزىكالىق سۋبۇرقاق جۇمىس ىستەمەيدى. سۋ استىنداعى پروجەكتورلاردىڭ شامامەن 300 شامىن اۋىستىرۋ جۇمىستارىن جۇرگىزەمىز. ەسكى ۇلگىدەگى شامداردى جاڭا جارىقديودتى شامدارعا اۋىستىرامىز»، - دەدى ول.
وسى ورايدا اۋدان اكىمى ءان قۇمارلارعا جاقسى جاڭالىعىمەن ءبولىستى.
«ۋادە بەرگەنىمدەي، اتالعان سۋبۇرقاقتىڭ مۋزىكالىق رەپەرتۋارىن سىزدەردىڭ ۇسىنىستارىڭىز بويىنشا وزگەرتەمىز. بۇل ءىستىڭ وزىندىك ەرەكشەلىكتەرى بار. پروتسەسس بارىنشا كۇردەلى، ماماندار بارلىعى بىركەلكى جۇمىس ىستەۋى ءۇشىن حورەوگرافيانى قولمەن باعدارلامالاپ شىعادى. جاقىندا «كوزىمنىڭ قاراسى»، «دۋدار-اي» جانە باتىرحان شۇكەنوۆ پەن ديماش قۇدايبەرگەننىڭ اندەرى مەن كلاسسيكالىق كومپوزيتسيالارىن ەستيمىز»، - دەدى بەرىك جاكەنوۆ.
