قوردايلىقتار مەملەكەتتىك ءتىلدى ۇيرەنىپ جاتىر

تاراز. قازاقپارات - جامبىل وبلىسىنىڭ اكىمى بەردىبەك ساپاربايەۆ قورداي اۋدانىنا ساپارى بارىسىندا سورتوبە اۋىلىنداعى مادەنيەت ۇيىندە جۇمىس ىستەپ وتىرعان «تىلدەر ساياباعى» جازعى لاگەرىندە بولدى.

مۇندا جەرگىلىكتى تۇرعىندارعا مەملەكەتتىك جانە شەت تىلدەرى وقىتىلۋدا، دەپ حابارلايدى قازاقپارات.

الەۋمەتتىك جوبانىڭ جەتەكشىسى باقنۇر زيابەكوۆتىڭ ايتۋىنشا، بۇگىندە لاگەردە 200 ادام قازاق، اعىلشىن، فرانسۋز تىلدەرىن ۇيرەنۋدە. تىڭداۋشىلار اراسىندا بالالار دا، ەرەسەكتەر دە بار. اشىق اسپان استىنداعى شارالار اپتاسىنا ءۇش رەت وتكىزىلەدى.

اۋىل تۇرعىندارىنا نازاربايەۆ ۋنيۆەرسيتەتىنىڭ، ءال- فارابي اتىنداعى قازاق ۇلتتىق ۋنيۆەرسيتەتىنىڭ جانە قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتتەرى ساباق بەرەدى. ايماق باسشىسى اۋدانداعى بەلسەندىلەر مەن ەرىكتىلەرگە قىرۋار شارۋالارى ءۇشىن العىسىن ءبىلدىرىپ، تۇرعىندارعا مەملەكەتتىك ءتىلدى ءبىلۋدىڭ ماڭىزدىلىعىن ەسكە سالدى.

«ەگەر اتا- انالار بالالارىمەن قازاقشا سويلەسسە، بالالار تەز ءتىل ۇيرەنەدى. مەملەكەتتىك تىلمەن قاتار، باسەكەگە قابىلەتتى بولۋعا كومەكتەسەتىن باسقا دا شەت تىلدەرىن ءبىلۋ قاجەت. ءبىزدىڭ مىندەتىمىز - جاستارعا لايىقتى ءبىلىم بەرىپ، بىرنەشە ءتىلدى مەڭگەرۋىنە جاعداي جاساۋ. وسىنداي جۇمىستى باسقا اۋىلداردا دا ۇيىمداستىرۋ كەرەك»، - دەدى بەردىبەك ساپاربايەۆ.

سونداي- اق ءوڭىر باسشىسى اۋىلداعى بالىق شارۋاشىلىعىن دامىتۋعا جاقسى جاعداي جاسالعانىن نازاردان تىس قالدىرمادى. ول فورەل مەن بەكىرە تۇقىمدارىن وسىرەتىن فەرمادا بولىپ، قۇرىلىمنىڭ تىنىس- تىرشىلىگىمەن تانىستى. مۇندا جىلىنا 5-7 توننا بالىق وندىرىلەدى ەكەن. ونىمدەر جەرگىلىكتى ايماقتا ساتىلادى. بالىقتار شەتەلدەن اكەلىنەتىن ارنايى تاعاممەن قورەكتەنەدى.

جۇمىس ساپارى بارىسىندا وبلىس اكىمى اۋدانداعى جولداردىڭ قۇرىلىسىمەن دە تانىستى. ول مەردىگەر كومپانيا وكىلدەرىمەن بىرگە توسەلگەن اسفالتتىڭ ساپاسىن تەكسەردى. بيىل قورداي اۋدانىندا ينفراقۇرىلىمدى جاقسارتۋعا، ونىڭ ىشىندە جولداردى جوندەۋگە شامامەن 7 ميلليارد تەڭگە ءبولىندى. بۇل قارجىعا جالپى ۇزىندىعى 352 شاقىرىم اۆتوموبيل جولى جوندەۋدەن وتپەك.

اۆتور: قاجى مۇرات