الماتى بلوكپوستىندا قازا تاپقان پوليتسەيلەرگە قانداي كومەك كورسەتىلەدى

نۇر- سۇلتان. قازاقپارات – ق ر ىشكى ىستەر ءمينيسترى ەرلان تۇرعىمبايەۆ الماتى بلوكپوستىندا قازا تاپقان پوليتسيا قىزمەتكەرلەرىنىڭ وتباسىنا قانداي كومەك كورسەتىلەتىنىن ايتتى، دەپ حابارلايدى قازاقپارات ءتىلشىسى.

«قىزمەتتىك مىندەتىن وتەۋ بارىسىندا قازا تاپقان پوليتسيا قىزمەتكەرلەرىنە مەملەكەت تاراپىنان جەرلەۋ شىعىندارى وتەلەدى. ول 400-دەن 500 مىڭ تەڭگەگە دەيىنگى مولشەردە بولادى. سونىمەن قاتار قازا تابۋىنا بايلانىستى بىررەتىك وتەماقى بەرىلەدى. جانعازيەۆكە شامامەن 10 ميلليون، ءابدىقانوۆقا 7,5 ميلليون تەڭگە بەرىلەدى. ءبىزدىڭ قىزمەتكەرلەرىمىزدىڭ بارلىعى ساقتاندىرىلعان. سوندىقتان الەۋمەتتىك قورعاۋ ورگاندارى تاراپىنان مەملەكەتتىك الەۋمەتتىك ساقتاندىرۋ قورىنان اسىراۋشىسىنان ايىرىلۋىنا بايلانىستى ونىڭ بالالارىن اسىراۋعا تولەم قاراستىرىلعان»، - دەدى ەرلان تۇرعىمبايەۆ ورتالىق كوممۋنيكاتسيالار قىزمەتىندە وتكەن بريفينگىدە ب ا ق وكىلدەرىنىڭ ساۋالىنا وراي.

مينيستر بۇكىل ەلىمىزدى ءدۇر سىلكىنتكەن وسى وقيعاعا بايلانىستى الماتىعا بارىپ، قازا تاپقان ەكى قىزمەتكەردىڭ وتباسىلارىنا كوڭىل ايتقانىن اتاپ ءوتتى.

«ويتكەنى ولار ءبىزدىڭ ۇزدىك قىزمەتكەرلەرىمىز ەدى. قىزمەتتىك مىندەتتەرىن ورىنداۋ بارىسىندا قازا تاپتى. ولار 78 تاۋلىك بويى كۇنى- ءتۇنى اتالعان بلوكپوستاردا، ءىس جۇزىندە وتباسىنان شالعايدا ءجۇردى. سونىمەن قاتار قىزمەتتىك پارىزدارىن سوڭىنا دەيىن اتقاردى. ولار مەملەكەت باسشىسىنىڭ جارلىعىمەن مەملەكەتتىك ناگرادالارمەن ماراپاتتالدى. سونىمەن قاتار قازىرگى ۋاقىتتا الماتى اكىمدىگى تاراپىنان ولاردىڭ وتباسىنا باسپانا ءبولۋ ماسەلەسى قاراستىرىلىپ جاتىر. جانعازييەۆتىڭ ارتىندا ايەلى مەن ەكى بالاسى قالدى. جۇبايى دارىگەر، ول دا وسى كۇندەرى اۋرۋحانادا جۇمىس ىستەدى. تاياۋدا شاڭىراق كوتەرگەن ءابدىقانوۆتىڭ بالاسىنىڭ دۇنيەگە كەلگەنىنە ءبىر عانا اي بولدى. ول دا جاس وتباسى، اتا- اناسىمەن بىرگە تۇرىپ كەلگەن. ەكەۋىنىڭ دە جەكەمەنشىك باسپانالارى بولماعان. سوندىقتان اكىمدىككە ءوتىنىش جاسادىم. قالا اكىمى شەشىم قابىلدادى. تاياۋ ۋاقىتتا باسپانا ماسەلەسى شەشىلەدى دەپ ويلايمىن»، - دەدى ەرلان تۇرعىمبايەۆ.

سونىمەن قاتار مينيستر وسى وقيعا كەزىندە جاراقات الىپ، بىرنەشە كۇن بويى اۋرۋحانانىڭ جانساقتاۋ بولىمىندە جاتقان ءۇشىنشى قىزمەتكەردىڭ ءومىرى ءۇشىن ارپالىسىپ جۇرگەن دارىگەرلەرگە ريزاشىلىعىن ءبىلدىردى.

«ونى جانساقتاۋ بولىمىنەن جالپى پالاتاعا اۋىستىردى. دەنساۋلىعىنا ەش ءقاۋىپ ءتونىپ تۇرعان جوق»، - دەدى ول.

اۆتور: مارلان جيەمباي