الماتى اكىمدىگى ءمايتتى ورتەيتىن كرەماتوري قاشان سالىناتىنىن ايتتى

الماتى. قازاقپارات - الماتى اكىمدىگى قالادا كرەماتوري قۇرىلىسى قاشان باستالاتىنىن ايتتى، دەپ حابارلايدى قازاقپارات ءتىلشىسى.

«بۇعان دەيىن الماتى اكىمدىگى پاتولوگواناتوميالىق بيۋرو (ءمايىتحانا) مەن كرەماتوري قۇرىلىسىنىڭ جوبالىق- سمەتالىق قۇجاتتاماسىن ازىرلەۋدى جوسپارلاعان بولاتىن. الايدا، جەتكىلىكتى قارجى بولماعاندىقتان، كرەماتوري قۇرىلىسى كەيىنگە قالدىرىلدى. ال 9-ساۋىردە ۇكىمەتتىڭ №187-قاۋلىسىمەن كرەماتوري قۇرىلىسىنا قاراجات ءبولۋ تۋرالى شەشىم قابىلداندى»، - دەپ حابارلادى اكىمدىكتىڭ باسپا ءسوز قىزمەتىنەن.

قازىرگى ۋاقىتتا جوبالىق- سمەتالىق قۇجاتتامانى ازىرلەۋ جۇمىستارى باستالدى. قۇجاتتاما جاسالىپ، وڭ ساراپتامالىق قورىتىندى شىققاننان كەيىن نىساننىڭ قۇرىلىسى قاراستىرىلادى.

ەسكە سالايىق، الماتى اكىمدىگى كرەماتوري قۇرىلىسىنىڭ جوبالىق- سمەتالىق قۇجاتتاماسىن جاساۋعا تەندەر جاريالاعان بولاتىن. تەحنيكالىق سيپاتتاماعا سايكەس، كرەماتوري ءبىر زالدان جانە ەكى پەشتەن تۇرادى. جوبا قۇجاتتاماسىن ازىرلەۋگە 46,8 ميلليون تەڭگە بولىنگەن. تاپسىرىس بەرۋشى - «الماتى قالاسى جايلى قالالىق ورتا باسقارماسى» كوممۋنالدىق مەملەكەتتىك مەكەمەسى.