قازاقستاندا ديپلومنىڭ شىنايىلىعىن تەكسەرەتىن ونلاين قىزمەت ىسكە قوسىلادى

نۇر-سۇلتان. قازاقپارات - قازاقستاندا ديپلومنىڭ شىنايىلىعىن تەكسەرەتىن قىزمەت ىسكە قوسىلادى.

بۇل تۋرالى ق ر سيفرلىق دامۋ، يننوۆاتسيالار جانە اەروعارىشتىق دامۋ ءمينيسترى اسقار جۇماعاليەۆ مالىمدەدى، دەپ حابارلايدى قازاقپارات.

«سوڭعى جازبالارىما ءبىرقاتار قىزىقتى پىكىرلەر مەن ۇسىنىستار جازىلعان ەكەن. سونىڭ بىرنەشەۋىنە جەكە- جەكە توقتالسام دەيمىن. جۇمىس بەرۋشىنىڭ ديپلومنىڭ شىنايىلىعىن ولاين تەكسەرۋى ءۇشىن ديپلومداردى سيفرلاندىرۋ ۇسىنىلدى. بۇل باعىتتا جۇمىس جۇرگىزىلىپ جاتىر. ءبىلىم مينيسترلىگى قازىر ديپلومداردىڭ دەرەكتەر بازاسىن تولىقتىرىپ جاتىر. جىل سوڭىنا دەيىن ديپلومنىڭ شىنايىلىعىن تەكسەرەتىن سەرۆيستى ىسكە قوسۋ جوسپارلانعان»، - دەپ جازدى مينيستر Facebook جەلىسىندە.

ءمينيستردىڭ ايتۋىنشا، تۇرعىندار اۋرۋحانا قاعازىن ەلەكتروندى فورماتقا اۋىستىرىپ، دەكرەتتىك تولەمدەردىڭ پرواكتيۆتى كورسەتىلۋىن ۇسىنعان.

«بۇل ماسەلە دە ۆەدومستۆوارالىق كوميسسيا وتىرىستارىندا كوتەرىلگەن. جۇكتى ايەلدەر ح ق و-عا كەلىپ اۋرە بولماۋى ءۇشىن بوسانۋعا دەيىنگى جانە دەكرەتتىك تولەمدەردى پرواكتيۆتى فورماتقا اۋىستىرۋ ۇسىنىلعان. كەشە ەڭبەك جانە حالىقتى الەۋمەتتىك قورعاۋ، دەنساۋلىق ساقتاۋ مينيسترلىكتەرىندەگى ارىپتەستەرمەن كەزدەسىپ، پرواكتيۆتى فورماتقا اۋىستىرۋدى جەدەلدەتۋ تۋرالى ۋاعدالاستىق. جاقىن ارادا ونىڭ ناتيجەسىن حابارلايمىن»، - دەدى ا. جۇماعاليەۆ.

سونىمەن بىرگە، تۇرعىندار قۇجاتتارعا اپوستيل قويۋ ماسەلەسىن دە كوتەرگەن.

«شەتەلدە جۇرگەن ادامدارعا كەيدە اپوستيلى بار قۇجات قاعاز جۇزىندە كەرەك بوپ، ونى قازاقستاننان الدىرۋ قاجەت بولادى. ادىلەت مينيسترلىگى ە-اپوستيل ازىرلەۋمەن اينالىسىپ جاتقانىن بىلەمىن، بۇل قۇجاتتاردى ونلاين الۋعا مۇمكىندىك بەرەدى. شامامەن تامىز ايىندا بۇل قىزمەت قولجەتىمدى بولۋى مۇمكىن. حالىققا قىزمەت كورسەتۋ ورتالىعىندا بانك قوسىمشالارى ارقىلى تولەم جاساۋعا بولادى. قازىر دە مەملەكەتتىك باج سالىعى QR- كود ارقىلى تولەنەدى. ءۇشىنشى توقساننىڭ سوڭىنا دەيىن باسقا دا قىزمەت تۇرلەرىن، جىلجىمايتىن مۇلىكتى تىركەۋ اقىسىن دا QR- كودپەن تولەۋ مۇمكندىگىن جاساۋدى تاپسىردىم»، - دەدى اسقار جۇماعاليەۆ.