قازاقستاندا قىزمەتتەر سەكتورى قالپىنا كەلە باستادى

نۇر- سۇلتان. قازاقپارات - ۇلتتىق ەكونوميكا ءمينيسترى رۋسلان دالەنوۆ 2020 -جىلدىڭ قاڭتار- مامىر ايلارىنىڭ قورىتىندىلارى بويىنشا ەلدىڭ الەۋمەتتىك- ەكونوميكالىق دامۋ ناتيجەلەرىن بايان ەتتى، دەپ حابارلايدى قازاقپارات ءتىلشىسى.

«جەدەل دەرەكتەر بويىنشا جالپى ىشكى ءونىم %1,7 عا تومەندەدى. تاۋارلار ءوندىرىسى %4,8 عا ءوستى. سونىمەن بىرگە كورسەتىلەتىن قىزمەتتەر% 6,2 عا قىسقاردى»، - دەدى ۇلتتىق ەكونوميكا ءمينيسترى ۇكىمەت وتىرىسىندا.

ونىڭ ايتۋىنشا جىلدىق ينفلياتسيا %6,7 دى قۇراعان. بۇل وتكەن ايدىڭ دەڭگەيىنەن تومەن بولىپ وتىر.

«جالپى، كەلەسىدەي جاعىمدى ۇردىستەر بايقالۋدا. وندىرىستىك سەكتوردا ءوسۋ جالعاسىپ كەلەدى. قىزمەتتەر سەكتورى مامىردان باستاپ سەرپىندى تۇردە قالپىنا كەلە باستادى. سونىمەن بىرگە ساۋدا بالانسىنىڭ سالدوسى جوعارى ءوسىمدى كورسەتتى»، - دەدى ول.