د د ۇ باسشىسى: الەمدە كوروناۆيرۋس ءورشىپ بارادى

بريۋسسەل. قازاقپارات - ەۋروپادا كوروناۆيرۋستىڭ جايىلۋى سايابىرسىدى، الايدا الەمدەگى احۋال كوڭىل كونشىتپەيدى.

بۇل تۋرالى دۇيسەنبى كۇنى ونلاين- بريفينگ بارىسىندا دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس ادحانوم گەبرەيەسۋس مالىمدەدى، دەپ حابارلايدى قازاقپاراتتىڭ مەنشىكتى ءتىلشىسى.

«د د ۇ كەلتىرگەن دەرەكتەرگە ساي، قازىرگە دەيىن 7 ميلليون ادامنان كوروناۆيرۋس انىقتالدى جانە بۇل ىندەتتەن 400 مىڭ ادام كوز جۇمعان. ەۋروپادا جاعداي جاقسارا تۇسكەنىمەن، جاھاندىق دەڭگەيدە احۋال ناشارلاپ بارادى»، - دەدى گەبرەيەسۋس.

ونىڭ ايتۋىنشا، سوڭعى 9 كۇندە تاۋلىك سايىن ك ۆ ي انىقتالعان ادام سانى 100 مىڭنان اسىپ ءتۇسىپ وتىرعان. ال جەكسەنبى كۇنى، ءتىپتى، بۇل سيفر 136 مىڭعا جەتكەن.

«كەشە انىقتالعان بارلىق اۋرۋ سانىنىڭ 75 پايىزى 10 مەملەكەتكە تيەسىلى، كوبى — امەريكا جانە وڭتۇستىك ازيا ەلدەرى»، - دەيدى د د ۇ باسشىسى.

ودان بولەك، سپيكەر افريكا ەلدەرىندە دە جاعداي ءماز ەمەستىگىن جەتكىزدى. جانە دە شىعىس ەۋروپا مەن ورتالىق ازيا ەلدەرىندە ىندەت كورسەتكىشى ءوسىپ كەلە جاتقانىن ايتتى.