قازاقستان سوۆەت كەزەڭىنەن قالعان اۋەجاي كودتارىن وزگەرتۋگە نيەتتى

نۇر- سۇلتان. قازاقپارات - قازاقستاننىڭ بىرنەشە قالاسىندا اۋەجاي كودتارى وزگەرتىلۋى مۇمكىن. بۇل تۋرالى ق ر يندۋستريا جانە يننوۆاتسيالىق دامۋ مينيسترلىگى ازاماتتىق اۆياتسيا كوميتەتىنىڭ ءتوراعاسى تالعات لاستايەۆ ايتتى، دەپ حابارلايدى قازاقپارات ءتىلشىسى.

«شىن مانىندە NNN سىندى كودتىڭ ءتۇرلى نۇسقالارى ۇسىنىلدى. بۇل كود حالىقارالىق IATA ۇيىمىمەن كەلىسىلەدى. كەلەسى قادام - اتىراۋ (GUW)، اقتاۋ (SCO) سىندى وزگە قالالاردىڭ اۋەجايلارىنداعى كودتى وزگەرتۋ. بۇل كودتار كەڭەستىك زاماننان قالعان. وسى باعىتتا IATA ۇيىمىمەن بىرلەسىپ، جۇمىس ىستەۋدى جوسپارلادىق»، - دەدى تالعات لاستايەۆ ەلوردا اۋەجايىندا تىلشىلەرگە بەرگەن سۇحباتىندا.

ونىڭ ايتۋىنشا، IATA ۇيىمىنىڭ نەگىزگى تالابى - اۋەجايلارعا ءبىر رەت تۇراقتى كود بەرۋ جانە ونى وزگەرتپەۋ.

«ءبىز ءوز تاراپىمىزدان ارگۋمەنتتەر كەلتىرىپ، جۇيەلى تۇردە IATA قاعيدالارىنا وزگەرىس ەنگىزدىك. بۇعان دەيىنگى قاراردا كودتىڭ وزگەرتىلمەيتىنى ايتىلسا، قازىر بەلگىلى ءبىر جاعدايدا وزگەرتۋگە بولاتىنى تۋرالى وزگەرىس ەنگىزىلدى. ياعني، ءبىز بارلىق مەملەكەتتەرگە مۇمكىندىك اشىپ بەردىك. ولار دا كورسەتىلگەن تالاپتاردى ساقتاي وتىرىپ، كودتارىن وزگەرتە الادى. ءبىز مۇنى قازاقستان ءۇشىن عانا جاساعان جوقپىز»، - دەدى ت. لاستايەۆ.

سونىمەن بىرگە، كوميتەت ءتوراعاسى كود وزگەرتۋدەگى شىعىندار تۋرالى ايتىپ بەردى. «بۇل وزگەرىس فيزيكالىق تۇرعىدا ەش شىعىندى قاجەت ەتپەدى. بۇل - مەملەكەتتىك ورگانداردىڭ ەرەن ەڭبەگى. اسىرەسە ق ر سىرتقى ىستەر مينيسترلىگى كوپ جۇمىس اتقاردى»، - دەدى ت. لاستايەۆ.

اۆتور: ايجان سەرىكجان قىزى