شىعىس قازاقستاندا ورتا عاسىرلىق قالاشىقتىڭ ورنى تابىلدى

وسكەمەن. قازاقپارات - شىعىس قازاقستان وبلىسى زايسان اۋدانىنىڭ اۋماعىنان ورتا عاسىرلىق قالاشىقتىڭ ورنى تابىلدى. بۇل جايلى قازاقپارات تىلشىسىنە بەلگىلى ارحەولوگ ابدەش تولەۋباي مالىمدەدى.

ارحەولوگتىڭ ايتۋىنشا، كونە شاھاردىڭ ورنى قاراتال اۋىلىنا قاراستى جىڭىشكە وزەنىنىڭ بويى مەن سارجىرا اۋىلىنىڭ ماڭىنان تابىلدى. الايدا ونىڭ ناقتى قاي كەزەڭگە جاتاتىنىن ءدوپ باسىپ ايتۋعا ەرتە.

«ورتا عاسىرلىق قالاشىق 5 - عاسىر مەن 12 - عاسىرعا دەيىنگى ارالىققا تيەسىلى بولۋى مۇمكىن. وسى زايسان اۋدانىنداعى سارجىرا دەگەن جەردەن دە قالاشىق تابىلعان. ەكەۋىنىڭ ارالىعى - شامامەن 25-30 شاقىرىم. قالاشىقتاردان قىش قۇمىرا سىنىقتارى، قۇرىلىسقا پايدالانعان شاقپاق تاستار، مىس ىدىستاردىڭ سىنىقتارى، مىس پىشاق، تاستان ويىلىپ شەبەر جاسالعان اشەكەي بۇيىمنىڭ قالدىقتارى تابىلدى. بۇنى ايگىلى جىبەك جولىنىڭ كىشىگىرىم ءبىر تارماعى دەسە دە بولادى. نەگىزگى جول جوڭعار قاقپاسىنا قاراي كەتەدى. ياعني، جەتىسۋدان باستالادى. ەكىنشى ءبىر تارماعى تارباعاتايدى بوكتەرلەپ، اقسۋات، ودان ارى زايسان، ودان جەمەنەي، قارا ەرتىستىڭ بويىمەن قىتايعا قاراي وتكەن. وسى جولدا قالا جۇرتتارى، قونىس ورىندارى تابىلىپ جاتىر»، - دەيدى ابدەش تولەۋباي.

ونىڭ سوزىنشە، ەندى قازبا جۇمىستارى جۇرگىزىلەدى. قالاشىقتىڭ ناقتى كەزەڭى سول كەزدە بەلگىلى بولماق.

ايتا كەتەيىك، ارحەولوگ ابدەش تولەۋباي زايسان اۋدانى شىلىكتى اۋىلىنان ءۇشىنشى «التىن ادامدى» تاپقان.

اۆتور: تالعاتجان مۇحامەتبەك ۇلى