بەس مىڭ مامانعا باسپانا ءۇشىن بيۋدجەتتىك نەسيە بەرىلەدى

نۇر- سۇلتان. قازاقپارات - ۇلتتىق ەكونوميكا ءمينيسترى رۋسلان دالەنوۆ «ديپلوممەن اۋىلعا» جوباسى اياسىندا جاس مامانداردى قولداۋ شارالارى تۋرالى ايتىپ بەردى، دەپ حابارلايدى قازاقپارات ءتىلشىسى.

«مامانداردى اۋىلعا تارتۋ ءۇشىن «ديپلوممەن اۋىلعا» جوباسى ىسكە اسىرىلۋدا. بىلتىر 4 مىڭنان استام مامان 1200 اۋىلدا جۇمىسىن باستادى. بۇل تۇرعىدا مۇعالىمدەر، دارىگەرلەر، مادەنيەت جانە سپورت قىزمەتكەرلەرى، سونداي- اق ۆەتەرينارلار مەن اگرونومدار قامتىلدى»، - دەدى ر. دالەنوۆ ونلاين رەجيمدە حالىق الدىندا ەسەپ بەرۋ بارىسىندا.

ولار ءۇشىن باسپاناعا بيۋدجەتتىك نەسيە تۇرىندە مەملەكەتتىك قولداۋ كورسەتىلەدى. ونىڭ جوعارى سوماسى جىل سايىن ارتىپ كەلەدى. بۇگىندە ونىڭ كولەمى 4,1 ميلليون تەڭگەنى قۇرادى. نەسيەلەۋ ستاۆكاسى 15 جىلعا 0,01 پايىزدى قۇرادى. سونىمەن قاتار ر. دالەنوۆ جوبا اياسىندا كوشەتىندەرگە ارنايى اقى قاراستىرىلعانىن ەسكە سالدى.

«بيىل باسپاناعا بيۋدجەتتىك نەسيە تۇرىندە الەۋمەتتىك قولداۋ شارالارىمەن تاعى دا 5 مىڭ جاس مامان قامتىلادى. مەملەكەت باسشىسىنىڭ تاپسىرماسى بويىنشا «جاستار جىلى» اياسىندا قارجىلاندىرۋ كولەمى تورتتەن ءبىر بولىككە ارتىپ، بيىل ونىڭ سوماسى 20 ميلليارد تەڭگەگە جەتتى»، - دەدى ۆەدومستۆو باسشىسى.

اۆتور: رۋسلان عابباسوۆ