كوروناۆيرۋس: تۇركيا ارقىلى ەۋروپاعا باراتىن ميگرانتتار تاسقىنى كۇرت ازايدى

يزمير. انادولى-قازاقپارات - كوروناۆيرۋس پاندەمياسى كەزەڭىندە تەڭىز جولى ارقىلى ەۋروپاعا باراتىن ميگرانتتار تاسقىنى ەداۋىر ازايدى، دەپ حابارلايدى انادولى اگەنتتىگى.

ەگەر ىندەت باستالعانعا دەيىن ەۋروپاعا اۋعانستان، پاكىستان، يراك، يران جانە سيريا ءتارىزدى ەلدەردەن مىڭداعان ميگرانتتار مەن بوسقىندار وتۋگە ۇمتىلسا، سوڭعى ايلاردا ولاردىڭ سانى ايتارلىقتاي قىسقاردى.

تۇركيانىڭ جاعالاۋ كۇزەتى باسقارماسى، پوليتسيا جانە جاندارمەريا ەگەي تەڭىزى عانا ەمەس، جەرورتا جانە قارا تەڭىز ارقىلى وتۋگە ارەكەتتەنگەن ميگرانتتار تاسقىنىنىڭ جولىن كەسۋ ءۇشىن بارلىق شارالاردى جۇزەگە اسىرۋدا.

انادولى اگەنتتىگىنىڭ تۇركيانىڭ جاعالاۋ كۇزەتى باسقارماسىنا سىلتەمە جاساپ حابارلاۋىنشا، ناۋرىزدان ماۋسىم ايىنىڭ العاشقى كۇندەرىنە دەيىن وسى ەلدىڭ ماڭىنداعى تەڭىزدەردەن 2907 ميگرانت ۇستالعان.

ال ساۋىردە بۇل كورسەتكىش 253 كە كەمىسە، مامىردا 582 ادامدى قۇرادى. ەگەر 2019 -جىلدىڭ ناۋرىز-مامىرىندا تۇركيانىڭ جاعالاۋ كۇزەتى ەۋروپاعا وتپەك بولعان 7173 ميگرانتتى قولعا تۇسىرسە، بيىلعى جىلدىڭ سايكەس كەزەڭىندە ەكى ەسە از،

ياعني 3742 ميگرانتتى ۇستاعان.