ماسكا تاعۋ ەرەجەسىن بۇزعاندارعا ايىپپۇل سالىنادى
گرۋزيا پارلامەنتىنە قىلمىستىق كودەكس جانە اكىمشىلىك قۇقىق بۇزۋشىلىقتار تۋرالى كودەكسكە ءتيىستى تۇزەتۋلەر ەنگىزۋ ۇسىنىلعان، دەپ حابارلايدى قازاقپارات «نوۆوستي- گرۋزيا» سايتىنا سىلتەمە جاساپ.
تۇزەتۋلەرگە سايكەس، جابىق قوعامدىق ورىندا ماسكا تاعۋ ەرەجەسىن بۇزعان جەكە تۇلعاعا 50 لاري (شامامەن 17 دوللار) كولەمىندە ايىپپۇل سالىنادى. وسى ارادا، ءوزىنىڭ يەلىگىندەگى نەمەسە جالعا الىپ وتىرعان جابىق قوعامدىق ورىندا ادامداردىڭ ماسكاسىز جۇرۋىنە جول بەرگەن زاڭدى تۇلعاعا 500 لاري (شامامەن 170 دوللار) كولەمىندە ايىپپۇل سالىنادى.
زاڭ جوباسىنا سايكەس، قوعامدىق كولىكپەن، سونىمەن بىرگە مەترودا كەلە جاتىپ، ماسكا تاقپاعان جولاۋشىلارعا 50 لاري كولەمىندە ايىپپۇل سالىنادى. ماسكا تاقپاعان قوعامدىق كولىك جۇرگىزۋشىسى دە 50 لاري تولەۋى ءتيىس بولادى. تاكسيگە كەلەتىن بولساق (م1 ساناتى)، بۇل جاعدايدا جولاۋشىلار دا بەتپەردە كيۋى ءتيىس. ەگەر جولاۋشى ماسكا تاقپاسا، وزىنە دە، تاكسي جۇرگىزۋشىسىنە دە 50 لاري تولەۋگە تۋرا كەلەدى. سونداي-اق، ەگەر اۆتوموبيل ىشىندە جۇرگىزۋشىمەن قوسا جول ءجۇرىپ كەلە جاتقاندار سانى ءتورت ادامنان اساتىن بولسا، بارلىعى 50 لاريدەن تولەيدى.
وزگەرىستەر وقشاۋلاۋ جانە كارانتين ەرەجەلەرىن بۇزعاندارعا دا قاتىستى بولادى: بۇل جاعدايدا جەكە تۇلعاعا 2 مىڭ لاري (شامامەن 690 دوللار)، ال زاڭدى تۇلعا - 10 مىڭ لاري (شامامەن 3,4 مىڭ دوللار) كولەمىندە ايىپپۇل تولەيدى.
