ق ر پرەزيدەنتى اقمولا وبلىسىنداعى كۇن ەلەكتر ستانسياسىن ارالاپ كوردى

اقمولا وبلىسى. قازاقپارات - بۇگىن مەملەكەت باسشىسى اقمولا وبلىسى، تسەلينوگراد اۋدانىنا جۇمىس ساپارىمەن باردى، دەپ حابارلايدى اقوردا.

پرەزيدەنت ساپارى «Hevel Kazakhstan» جاۋاپكەرشىلىگى شەكتەۋلى سەرىكتەستىگىنە قاراستى كۇن ەلەكتر ستانسياسىنىڭ جۇمىسىمەن تانىسۋدان باستالدى.

اتالعان نىسان بيىل پايدالانۋعا بەرىلدى. قاسىم- جومارت توقايەۆقا ايماقتاعى «جاسىل ەنەرگەتيكانى» دامىتۋ پەرسپەكتيۆاسى جايىندا باياندالدى.

قۋاتتىلىعى 100 م ۆ ت بولاتىن ەلەكتر ستانتسيانىڭ قۇرىلىسىنا 30 ميلليارد تەڭگەگە جۋىق ينۆەستيسيا سالىنعان. ستانسيا جىلىنا 148 ميلليون كيلوۆات ساعات ەلەكتر قۋاتىن وندىرەدى.

قۇرىلىس جوباسىن سالۋ بارىسىندا كومپانيانىڭ ءوز ازىرلەمەسى، اتاپ ايتقاندا، گەتەروقۇرىلىمدى ەكى جاقتى كۇن مودۋلى سەكىلدى يننوۆاتسيالىق تەحنولوگيا پايدالانىلعان. مەملەكەت باسشىسى قازاقستانداعى جاڭارتىلعان قۋات كوزىن پايدالانۋدىڭ ماڭىزدىلىعىن اتاپ ءوتىپ، ەلەكتر ستانتسياسىنىڭ قىزمەتكەرلەرىنە تابىس تىلەدى.