18:30, 28 - مامىر 2020 | GMT +5
اقتوبە حروم قوسىندىلارى زاۋىتىندا ءتورت جۇمىسشى مەرت بولدى
اقتوبە. قازاقپارات - اقتوبە حروم قوسىندىلارى زاۋىتىندا ءتورت ادام كوز جۇمىپ، ەكەۋى اۋرۋحاناعا ءتۇستى، دەپ حابارلايدى قازاقپارات ءتىلشىسى.
اقتوبە وبلىستىق پوليتسيا دەپارتامەنتىنە حابار جەرگىلىكتى ۋاقىتپەن ساعات 13:20-دا ءتۇستى. وندا №4 سەحتا جۇمىسشىلاردىڭ مەرت بولعانى ايتىلدى.
«جۇمىسشىلار تاڭەرتەڭ 50 تەكشە مەتر بولاتىن باكتى تازارتقان. كەيىن بىرەۋى اقاۋدى كورىپ، ىشىنە كىرەدى. شىقپاعان سوڭ تاعى ۇشەۋى تۇسكەن. تورتەۋى وقيعا ورنىندا كوز جۇمدى. ەكى ادام جەدەل جاردەم اۋرۋحاناسىنا جەتكىزىلدى. اتالعان فاكتى بويىنشا وبلىستىق پوليتسيا دەپارتامەنتى قىلمىستىق كودەكستىڭ «ابايسىزدا ەكى جانە ودان دا كوپ ادامنىڭ ولىمىنە اكەپ سوققان قاۋىپسىزدىك تەحنيكاسىن بۇزۋ» بابى بويىنشا تەرگەۋ باستالدى. ءىستىڭ ءمان- جايى انىقتالۋدا»، - دەدى وبلىستىق پوليتسيا دەپارتامەنتىنىڭ باستىعى اتىناي ارىستانوۆ.
اۆتور: التىناي ساعىندىقوۆا
