كوروناۆيرۋس جاس تالعامايدى - التاي كولگىنوۆ
بۇل تۋرالى حابار-24 تەلەارناسىنىڭ تىكەلەي ەفيرىندە نۇر-سۇلتان قالاسىنىڭ اكىمى التاي كولگىنوۆ ايتتى، دەپ حابارلايدى قازاقپارات ءتىلشىسى.
«الەمدىك پاندەميا قالىپتى ومىرىمىزگە وزگەرىستەر ەنگىزىپ، باسقاشا ءومىر سۇرۋگە ءماجبۇر ەتتى. مەملەكەت باسشىسى قاسىم-جومارت توقايەۆتىڭ توتەنشە جاعداي ەنگىزۋ تۋرالى جارلىعى ازاماتتارىمىزدىڭ ءتارتىپتى ساقتاپ، ينفەكتسيادان قورعانۋىمىزعا سەپتىگىن تيگىزدى. پرەزيدەنتتىڭ دەر كەزىندە قابىلداعان شارالارى ازاماتتاردىڭ وقشاۋلانۋىنا جاعداي جاساپ، ناتيجەسىندە ۆيرۋستىڭ كەڭ تارالۋىنا جول بەرىلگەن جوق. وسىنداي سىن ساعاتتا حالىقتىڭ ءبىرتۇتاستىعى ماڭىزدى. ىندەت تارالا باستاعان العاشقى كەزدە ەلباسى نۇرسۇلتان نازاربايەۆتىڭ حالىققا ارناعان ۇندەۋى قوعامدىق بىرىكتىرىپ، قيىندىقتى بىرگە ەڭسەرۋگە كومەگىن تيگىزدى»، - دەدى التاي كولگىنوۆ.
ەلوردا باسشىسىنىڭ دەرەگىنشە، وسى ارالىقتا ەلوردادا كوروناۆيرۋس جۇقتىرعان 1686 ناۋقاس تىركەلدى. 835 پاسيەنت نەمەسە 51 پايىز ازامات ەمدەلىپ شىقسا، قالعاندارى قازىرگى ۋاقىتتا كارانتيندە جاتىر. وكىنىشكە قاراي 5 ادام قازا بولدى.
«قازىرگى كۇندەلىكتى ءوسۋ ستاتيستيكاسى 2 دەن 4 پايىزعا دەيىن بولىپ وتىر. ناۋقاستاردىڭ 40 پايىزى - 30 جاسقا دەيىنگى جاستار، ال 35 پايىزى – 30 دان 50 جاسقا دەيىنگى ادامدار. ياعني، وسى ستاتيستيكاعا جۇگىنەر بولساق، ۆيرۋس تەك قانا ۇلكەن ادامدارعا، زەينەتكەرلەرگە نەمەسە بۇرىنان اۋرۋى بار ازاماتتارعا قاۋىپتى دەگەن ءسوز راستالمادى. سوندىقتان قازىرگى جاعدايدا، ءبىزدىڭ تاجىريبە كورسەتكەندەي، كوروناۆيرۋس جاس تالعامايدى. ياعني، كوروناۆيرۋستان بارلىعىمىز بىردەي ساقتانۋىمىز قاجەت. ساقتىقتا قورلىق جوق»، - دەدى نۇر-سۇلتان قالاسىنىڭ اكىمى.
